फादर्स डे (Father's Day) दरवर्षी जूनच्या तिसऱ्या रविवारी साजरा केला जातो. यंदा हा विशेष दिवस १९ जून रोजी साजरा केला जाणार आहे. त्यानिमित्तानं फादर्स डे'चा इतिहास आपण जाणून घेणार आहोत.

इतिहास : फादर्स डे'ची स्थापना USA मध्ये, वॉशिंग्टनमधील स्पोकेन (Washington Spokane) इथं सोनोरा स्मार्ट डॉड यांनी 1910 मध्ये केली होती. त्या वर्षी, 19 जून 1910 रोजी फादर्स डे साजरा करण्यात आला. एना जार्विसने तिच्या आईच्या सन्मानार्थ मदर्स डेची स्थापना कशी केली, याबद्दल सोनोराने ऐकले होते आणि याच धर्तीवर वडिलांच्या स्मरणार्थ काहीतरी असावे, असं तिच्या चर्चच्या पाद्रीला सांगितलं. सोनोराचे वडील गृहयुद्धातील दिग्गज विल्यम जॅक्सन स्मार्ट (William Jackson Smart) होते. ते एकल पालक होते. त्यांनी सहा मुले एकट्यानं वाढवली. सोनोराला आशा होती की, तिच्या वडिलांच्या वाढदिवशी म्हणजे 5 जून रोजी फादर्स डे साजरा केला जाईल, पण चर्चच्या वेळेच्या मर्यादांमुळे हा दिवस पुढे ढकलला गेला आणि तेव्हापासून हा उत्सव जूनच्या तिसऱ्या रविवारी साजरा करण्यात येतो.

महत्त्व

दरवर्षी फादर्स डे'च्या दिवशी मुले त्यांच्या वडिलांची भूमिका समजून घेतात आणि त्यांचे कौतुक करतात. हेच वडील मुलांच्या आयुष्यात महत्त्वाची भूमिका बजावतात. मग ती भावनिक असो मानसिक असो की आर्थिक. या दिवशी मुलं वडिलांचे त्यांच्या स्वत: च्या कुटुंबासाठीचे आणि समाजासाठीचे योगदान कबूल करतात.

फादर्स डे'ला मुले त्यांच्या वडिलांसाठी किंवा वडिलांसारख्या व्यक्तीसाठी भेटवस्तू विकत घेतात किंवा बनवतात. आपल्या वडिलांसोबत आनंद लुटता येईल अशा कार्यक्रमांमध्ये दिवस घालवतात. मग ते गिर्यारोहण, मासेमारी किंवा काही दूरचित्रवाणी मालिका पाहणे असो. बहुतेक मुलांचे त्यांच्या आईशी जवळचे नाते असल्याने हा दिवस नक्कीच एखाद्याच्या वडिलांशी जवळचे नाते निर्माण करण्यास मदत करतो. फादर्स डे हा वडिलांचा उत्सव, पितृत्व, पितृत्वाचे बंध आणि समाजात वडिलांची भूमिका यांचा सन्मान करण्याचा उत्साह असतो.