Gudi Padwa 2024 : अवघ्या २ दिवसांवर गुढीपाडव्याचा सण येऊन ठेपला आहे. त्यामुळे, बाजारात सगळीकडे सध्या गुढीपाडव्याची धामधूम पहायला मिळत आहे. गुढीसाठी लागणारे रेडिमेड कापड, रेडिमेड साड्या, साखरेच्या गाठी, विविध प्रकारची फुले इत्यादी गोष्टी खरेदी करण्यासाठी नागरिकांची झुंबड उडाल्याचे चित्र आहे.

यंदा गुढीपाडव्याचा सण ९ एप्रिलला (मंगळवारी) साजरा केला जाणार आहे. हिंदू नववर्षाची सुरूवात ही गुढीपाडव्याच्या सणाने होते. शिवाय, हा सण महाराष्ट्रात मोठ्या थाटामाटात साजरा केला जातो. खास गुढीपाडव्यानिमित्त महिला मराठमोळा साज करण्यावर भर देतात.

जर यंदा तुम्ही देखील मराठमोळा साज करणार असाल तर, हा लेख शेवटपर्यंत वाचा. कारण, आज आम्ही तुम्हाला काही अभिनेत्रींच्या लूक्सबद्दल सांगणार आहोत. त्यांच्या लूक्सपासून तुम्ही प्रेरणा घेऊन गुढीपाडव्याला मस्त मराठमोळ्य ढंगात तयार होऊ शकता.

पैठणीचा साज

गुढीपाडव्याच्या निमित्ताने कित्येक महिला नऊवारीचा साज करतात. परंतु, यंदा जर तुम्हाला नऊवारीचा साज न करता काहीतरी वेगळा आणि तितकाच सुंदर लूक करायचा असेल तर तुम्ही अभिनेत्री सोनाली कुलकर्णीसारखा मस्त मराठमोळा लूक करू शकता.

या फोटोत सोनालीने मस्त निळ्या रंगाची पैठणी नेसली असून त्यावर मराठमोळे दागिने, नक्षीदार नथ, कानातील झुमके, गोल्डन नेकलेस असा साज केला आहे. ही ज्वेलरी तिच्या पैठणीला मस्त मॅच झाली आहे. केसांचा मस्त अंबाडा आणि मिनिमल मेकअप करून तिने तिचा लूक पूर्ण केला आहे. पाडव्यासाठी तुम्ही देखील अशा प्रकारची पैठणी नेसून त्यावर असा सुंदर लूक करू शकता.

खण साडी स्वॅग

मागील ४-५ वर्षांपासून खण साडीची फॅशन चांगलीच चर्चेत आली आहे. पूर्वीच्या काळी ही खण साडी महिला नेसायच्या. आता पुन्हा त्या साड्यांना वेगळा टच दिला जात आहे. या खण साड्यांना महिला वर्गातून चांगलीच पसंती मिळताना दिसते. या प्रकारची खण साडी गुढीपाडव्यासाठी बेस्ट ऑप्शन आहे.

अभिनेत्री प्राजक्ता माळीने या फोटोत सुंदर लाल आणि राखाडी रंगाची खण साडी नेसली आहे. या खण साडीवर तिने मॅचिंग अशी ऑक्सिडाईज्ड ज्वेलरी कॅऱी केली आहे. तुमच्याकडे जर खण साडी असेल तर तुम्ही देखील प्राजक्तासारखा लूक करू शकता.

खण साडीवर प्राजक्ताप्रमाणे तुम्ही केसांचा अंबाडा, हातात बांगड्या, कानात झुमके, गळ्यातले, नक्षीदार नथ आणि मिनिमल मेकअप करू शकता. मग, बघा तुमचा लूक कसा हटके दिसतो ते.