Hair Care Tips : आजकाल केसांच्या समस्या मोठ्या प्रमाणात वाढल्या आहेत. केस अकाली पांढरे होत आहेत. त्यामुळे, अनेक जण केसांना मेहंदी लावतात किंवा हेअर कलरिंग करतात. सध्या महिलांमध्ये हेअर कलरिंगची ही फार मोठी क्रेझ आहे. यामध्ये तरूणी आघाडीवर आहेत. हेअर कलरिंगमुळे केसांना सुंदर स्टायलिश लूक देखील मिळतो.

हेअर कलरिंगसोबतच, महिला आणि पुरूष देखील केसांना मेहंदी लावतात. मेहंदीमुळे केसांना लालसर कलर मिळतो. शिवाय, केस चमकदार दिसतात आणि पांढऱ्या केसांची समस्या देखील दूर होते. मेहंदी लावताना त्यामध्ये काही घरगुती गोष्टी देखील मिसळल्या जातात. जेणेकरून केसांना चांगले पोषण मिळू शकेल. शिवाय, यामुळे केसांचे कोणतेही नुकसान होत नाही आणि केस नैसर्गिकरित्या लाल होतात.

मेहंदीमुळे केस सिल्की, चमकदार आणि लालसर दिसण्यास मदत होते. जर तुम्हाला असे वाटत असेल की, मेहंदीचा अधिक प्रभाव केसांवर व्हावा, तर यासाठी तुम्ही मेहंदीमध्ये काही गोष्टी मिसळू शकता. कोणत्या आहेत त्या गोष्टी? चला तर मग जाणून घेऊयात.

जास्वंदाच्या फुलांची पावडर

मेहंदीमध्ये तुम्ही जास्वंदाच्या फुलांची पावडर मिसळू शकता. जास्वंद हे फूल केसांसाठी अतिशय फायदेशीर आहे. जास्वंदाची फुले वाळवून त्यापासून तुम्ही पावडर बनवू शकता किंवा मार्केटमध्ये मिळणारी जास्वंदाची पावडर आणू शकता.

ही ४-५ चमचे पावडर मेहंदीमध्ये मिसळा आणि चहापावडरे गाळलेले पाणी देखील त्यात घाला. रात्रभर ही मेहंदी चांगली भिजू द्या. दुसऱ्या दिवशी केसांना मेहंदी लावा. (Jasmine flower powder)

बीटाचा रस

आपल्या आरोग्यासाठी बीट अतिशय फायदेशीर मानले जाते. बीटामध्ये मोठ्या प्रमाणात पोषकघटकांचा समावेश आढळून येतो. या पोषकघटकांसोबतच बीटाचा लाल रस हा केसांसाठी देखील फायदेशीर ठरतो. कसा ते आपण पाहूयात.

केसांना अधिक लाल रंग मिळवून देण्यासाठी तुम्ही मेहंदीमध्ये बीटाचा रस मिसळू शकता. यासाठी ५-६ चमचे मेहंदीमध्ये ३-४ चमचे बीटाचा रस मिसळा. आता हे मिश्रण रात्रभर लोखंडाच्या तव्यात भिजत ठेवा. दुसऱ्या दिवशी सकाळी हे मिश्रण केसांना लावा. यामुळे, केसांना सुंदर रेड लूक मिळण्यास मदत होईल. शिवाय, केस मुलायम दिसतील. (Beetroot Juice)