Holi 2024 : रंगांचा उत्सव म्हणून ओळखला जाणारा होळी हा आनंदाचा सण आहे. हिंदू धर्मात होळी या सणाला विशेष महत्व आहे. दरवर्षी फाल्गुन महिन्यातील पौर्णिमेला हा सण भारतात मोठ्या उत्साहात साजरा केला जातो. त्यामुळे, या सणाला भारतात विशेष असे महत्व आहे. दसरा आणि दिवाळीप्रमाणे हा सण देशात मोठ्या थाटामाटात साजरा केला जातो.

अवघ्या काही दिवसांवर होळीचा सण येऊन ठेपला आहे. वाईटावर चांगल्याचा विजय याचे प्रतिक म्हणून हा सण साजरा केला जातो. होळी हा सौहार्द आणि  प्रेमाचा सण मानला जातो. यंदा २४ आणि २५ मार्चला होळी साजरी केली जाणार आहे. २४ मार्चला होलिका दहन आणि २५ मार्चला रंगांची उधळण केली जाणार आहे. होळीच्या दिवशी लोक एकमेकांना रंग लावून होळीच्या शुभेच्छा देतात.

परंतु, तुम्हाला हे माहित आहे का? की, होळीच्या दिवशी वापरल्या जाणाऱ्या विविध रंगांचे खास असे महत्व आहे. यातील प्रत्येक रंगाला धार्मिक आणि वैज्ञानिक असे महत्व आहे. होळीच्या निमित्ताने आज आपण विविध रंगांचे महत्व जाणून घेणार आहोत.

लाल रंग

होळीच्या दिवशी लाल रंगाचा सर्वाधिक वापर केला जातो. हा लाल रंग ऊर्जा, प्रेम, उत्साह आणि विजयाचे प्रतिक मानला जातो. तुम्ही तुमच्या प्रिय व्यक्तीला होळीच्या दिवशी हा लाल रंग लावू शकता. हा लाल रंग तुम्ही लावल्याने तुमचे त्या व्यक्तीबद्दलचे प्रेम आणि भावना सहजपणे व्यक्त करू शकाल. होळीच्या दिवशी या प्रेमाच्या रंगाची उधळण जरूर करा.

नीळा रंग

भगवान श्रीकृष्ण यांचे रूप निलांबर आहे. त्यामुळे, होळीच्या दिवशी या निळ्या रंगाचे खास असे महत्व आहे. हा निळा रंग विश्वास,शक्ती आणि प्रेम यांचे प्रतिक आहे. आकाशाच रंग देखील निळा आहे. तुम्ही होळीच्या दिवशी या निळ्या रंगाची होळी खेळू शकता. शिवाय, हा निळा रंग अनेकांना आवडतो.

पिवळा रंग

भारतीय संस्कृतीमध्ये या पिवळ्या रंगाला विशेष असे महत्व आहे. कारण, भारतातील प्रत्येक शुभ कार्याची सुरूवात ही पिवळ्या रंगाने केली जाते. शिवाय, हा पिवळा रंग शांती, समृद्धी आणि आरोग्याचे प्रतिक आहे.

गुलाबी रंग

होळीच्या दिवशी या गुलाबी रंगाचा वापर मोठ्या प्रमाणात केला जातो. हा गुलाबी रंग दयाळूपणा, मैत्री आणि इतरांची काळजी घेण्याचे प्रतिक मानले जाते. होळीला या गुलाबी रंगाचा वापर लोक मोठ्या प्रमाणात करतात. यासोबतच हिरवा, जांभळा, केशरी इत्यादी रंगांचा ही वापर केला जातो.