मुंबई : लहान मुलांचे जग वेगळेच असते. नवनवीन गोष्टी शिकण्याच्या ओढीने ही मुले वेगवेगळे प्रयोग करत असतात. अशाच एका लहानग्याने केलेल्या प्रयोगाची चित्रफीत समाजमाध्यमांवर प्रसारित होत आहे. हा मुलगा आपला आवडता 'पसानिया' हा खाद्यपदार्थ तयार करत आहे. हा एक इटालियन खाद्यपदार्थ आहे.

चित्रफितीच्या सुरुवातीला हा मुलगा आपल्याला लसग्न आवडत असल्याचे सांगत आहे. यावेळी तो या पदार्थाचा उल्लेख 'पसानिया' असा करत आहे. संपूर्ण चित्रफितीमध्ये हा मुलगा आपण हा पदार्थ योग्यरितीने करत असल्याचे सतत आपल्या आईला विचारत आहे. त्याची आई त्याच्यावर लक्ष ठेवून आहे; पण लझानियाची बहुतांश पाककृती या मुलाने स्वत:च केली आहे.

चित्रफितीच्या शेवटी हा मुलगा स्वत: केलेल्या लझानियाचा आस्वाद घेताना दिसत आहे. यावेळी त्याने लझानियावर मोझेरेला चिझही घातले आहे. ३० मार्चला ही चित्रफीत समाजमाध्यमांवर प्रसारित करण्यात आली होती. तेव्हापासून हा मुलगा आणि त्याचे लझानिया लोकांच्या पसंतीस उतरत आहे. आतापर्यंत १.४ दशलक्ष लोकांनी ही चित्रफीत पाहिली आहे.