श्रावण म्हणजे व्रतवैकल्ये आणि उत्सव-सणांचा महिना. श्रावण महिन्यातील देवीदेवतांची पूजा, उपवास, मंगळागौर, श्रावणी सोमवार-शनिवारी, सण-उत्सव, महादेवाची पूजा या सर्व गोष्टीस हिंदू परंपरेत खूप महत्त्व आहे. 

यापैकीच एक महत्त्वाचा सण म्हणजे नागपंचमी. हिंदू धर्मातील पौराणिक कथांमध्ये सापांचे महत्त्वपूर्ण असे स्थान आहे. नागपंचमी हा नागदेवतेची पूजा करण्याचा एक पारंपरिक सण आहे. हिंदू दिनदर्शिकेनुसार श्रावण शुक्ल पक्षाच्या पाचव्या दिवशी साजरा केला जाणारा नागपंचमी हा एक अनोखा सण आहे. कारण या दिवशी नागांची मनोभावे पूजा केली जाते. 

भाविक या दिवशी उपवास देखील करतात. नागपंचमीचे व्रत केल्याने आणि व्रत कथा वाचल्याने शुभ फळ मिळते, असे मानले जाते. आठ नागांना या व्रताचे देवता मानले जाते. या दिवशी अनंत, वासुकी, पद्म, महापद्म, तक्षक, कुलीर, कर्कट आणि शंख या आठ नागांची पूजा केली जाते. यंदा  नागपंचमीचा सण 21 ऑगस्ट म्हणजेच सोमवारी साजरा केला जाणार आहे.

नागपंचमी सणाचा शुभ मुहूर्त

• नागपंचमी सणाची तारीख-  21 ऑगस्ट, सोमवार 

• नाग पंचमी पूजेचा शुभ मुहूर्त - पहाटे 5 वाजून 53 मिनिटांपासून ते सकाळी 8 वाजून 30 मिनिटांपर्यंत  

• नागपंचमी तिथीची समाप्ती - 22 ऑगस्ट 2023 रोजी मंगळवार दुपारी 2:00 वाजता होईल 

नागपंचमी सणाची पूजा करण्याची योग्य पद्धत

• पंचमीच्या एक दिवस आधी म्हणजेच चतुर्थीच्या दिवशी एकदाच भोजन करावे. 

• पंचमीच्या दिवशी उपवास ठेवावा. या दिवशी संध्याकाळी उपवास सोडावा. 

• पूजा करण्यासाठी लाकडी पाटावर नागाची प्रतिमा किंवा नागाची मातीची मूर्ती स्थापित करावी.

• यानंतर त्यावर हळद, रोळी, अक्षता आणि फुले अर्पण करून नागदेवतेची पूजा करावी.

• नागदेवतेला कच्चे दूध, तूप आणि साखर अर्पण करावे. 

• पूजा केल्यानंतर नागदेवतेची आरती करावी. शेवटी नागपंचमीची व्रत कथा नक्की ऐकावी. 

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.