हिंदू संस्कृतीमध्ये श्रावण महिन्याला अनन्यसाधारण महत्त्व आहे. हा महिना भगवान शंकर महादेवाला समर्पित असतो. श्रावण सोमवारी महादेवाची विशेष पूजा केली जाते. हा काळ अत्यंत शुभ मानला जातो. यंदाचा श्रावणमास हा दोन महिन्यांचा असणार आहे. त्यामुळे महादेवाला प्रसन्न करण्याची मोठी संधी भक्तांना मिळणार आहे. (Shravan 2023)

श्रावणात भगवान शंकराची कृपादृष्टी मिळवण्यासाठी कित्येक लोक उपवास करतात. काही लोक संपूर्ण श्रावणमासात उपवास करतात, तर काही केवळ श्रावण सोमवारी उपवास करतात. या काळामध्ये उपवास करताना तुम्हाला काही गोष्टी लक्षात घेणं गरजेचं आहे.

महादेवांचा श्रावणमास

शास्त्रांमध्ये दिलेल्या माहितीनुसार, श्रावण महिन्यात भगवान विष्णू हे योगनिद्रेत जातात. विष्णू योगनिद्रेत असल्यामुळे भगवान शिव हे विश्व चालवण्याची जबाबदारी स्वीकारतात. म्हणूनच, श्रावण हा महादेवांचा महिना म्हणून ओळखला जातो.

या गोष्टी आवर्जून करा

श्रावणात दररोज सकाळी उठून, अंघोळीनंतर देवघर स्वच्छ करून घेणं गरजेचं आहे. यानंतर देवघरात गंगाजल शिंपडावे. त्यानंतर पूजेसाठी लागणारं साहित्य याठिकाणी ठेवावं. यामध्ये पाणी, दूध, साखर, तूप, दही, मध, चंदन, फुलं, मिठाई (नैवेद्य) आणि बेलाच्या पानाचा समावेश असावा. पूजेची तयारी करताना शिव स्त्रोताचा जप करत रहावे.

या गोष्टी टाळा

श्रावण महिन्यात उपवास करणाऱ्या व्यक्तीने या संपूर्ण काळात कांदा आणि लसूण खाऊ नये. श्रावण महिन्यात मांस, मासे आणि अंडी असे पदार्थ खाऊ नयेत. तसेच, श्रावण महिन्यात मद्यपान संपूर्णपणे टाळावे.

भगवान शंकराची पूजा करताना हळद आणि तुळशी या गोष्टींचा वापर टाळावा. श्रावणात तुम्ही सकाळी पकडलेला उपवास सायंकाळी सोडू शकता.

श्रावण सोमवार

यंदाचा श्रावणमास हा विशेष आहे. अधिकमासामुळे श्रावण दोन महिन्यांचा असणार आहे. जवळपास १९ वर्षांनी एवढ्या मोठ्या कालावधीसाठी म्हणजेच २ महिन्यांचा श्रावण महिना येण्याचा योग आला आहे. यावर्षी श्रावण महिना ४ जुलै ते ३१ ऑगस्ट या कालावधीमध्ये असणार आहे. यंदाचा पहिला श्रावण सोमवार हा १० जुलै रोजी असणार आहे. तर शेवटचा श्रावण सोमवार हा २८ ऑगस्ट रोजी असणार आहे.