Wedding Fashion : बॉलिवूडची ‘दबंग गर्ल’ अभिनेत्री सोनाक्षी सिन्हा तिचा बॉयफ्रेंड झहीर इक्बालसोबत नुकतीच विवाहबंधनात अडकली. नोंदणी पद्धतीने रविवारी (२३ जून) हे कपल लग्नबंधनात अडकले. त्यांच्या विवाहाला दोघांचे आई-वडील, नातेवाईक आणि जवळचे मित्र-मंडळी उपस्थित होते. हा विवाहसोहळा पार पडल्यानंतर सोनाक्षीने तिच्या लग्नाचे फोटो सोशल मीडियावर शेअर केले.

या फोटोंमधील सोनाक्षीचा सुंदर असा वेडिंग लूक सगळ्यांना प्रचंड आवडला. तिचा हा लूक समोर आल्यानंतर चाहत्यांनी तिच्यावर प्रेमाचा वर्षाव सुरू केला. या फोटोंमध्ये सोनाक्षीने नेसलेली साडी आणि दागिने हे तिच्या आईचे होते. विशेष म्हणजे तिच्या आईची साडी ही ४४ वर्षे जुनी आहे.

आईच्या साडीत सोनाक्षी कमालीची सुंदर दिसत होती. आज आम्ही तुम्हाला अशा काही अभिनेत्रींबद्दल सांगणार आहोत की, ज्यांनी सोनाक्षीप्रमाणे त्यांच्या लग्नात जुन्या साड्या परिधान केल्या होता.

सोनाक्षी सिन्हा

अभिनेत्री सोनाक्षी सिन्हाने तिच्या लग्नात तिची आई पूनम सिन्हा यांची ४४ वर्षे जुनी साडी नेसली होती. हीच साडी पूनम सिन्हा यांनी त्यांच्या लग्नात परिधान केली होती.

इतकेच नव्हे तर सोनाक्षीने तिची आईची ही साडी नेसून त्यावरील दागिने देखील आईचेच घातले होते. तिचा हा सिंपल सोबर लूक सगळ्यांना प्रचंड आवडला.

यामी गौतम

मागील काही दिवसांपूर्वीच आई झालेल्या अभिनेत्री यामी गौतमने कोरोना काळात अतिशय साध्या पद्धतीने लग्न केले. परंतु, तिचा लग्नातील लूक प्रचंड गाजला होता. कारण, यामीने लग्नात तिच्या आईची साडी नेसली होती.

तसेच, साडीचा लूक पूर्ण करण्यासाठी तिने सिल्क साडीसोबत मॅचिंग दुपट्टा देखील कॅरी केला होता. या संपूर्ण लूकमध्ये यामी खूपच सुंदर दिसत होती. विशेष म्हणजे या साडीवर यामीने तिच्या आईचे पारंपारिक दागिने परिधान केले होते.

करिना कपूर-खान

बॉलिवूडची ‘बेबो’ अभिनेत्री करिना कपूर खान तिच्या उत्तम अभिनयासाठी आणि फॅशन सेन्ससाठी खास करून ओळखली जाते. करिनाने अभिनेता सैफ अली खानसोबत २९ एप्रिल २०१२ मध्ये नोंदणी पद्धतीने विवाह केला होता.

या लग्नात तिने ३ पिढ्यांचा अमूल्य ठेवा असलेला पोशाख परिधान केला होता. सैफची आजी बेगम साजिदा सुलतान यांनी त्यांच्या लग्नात जो शरारा परिधान केला होता. तोच शरारा करिनाची सासू अर्थात अभिनेत्री शर्मिला टागोर यांनी त्यांच्या लग्नात परिधान केला होता.

सैफची आई शर्मिला यांचा विवाह २७ डिसेंबर १९६८ मध्ये पतौडी कुटुंबातील सैफचे वडील नवाब मन्सूर अली खान पतौडी यांच्यासोबत झाला होता. त्यावेळी शर्मिला यांनी हाच शरार घातला होता. त्यानंतर, पतौडी घराण्याच्या परंपरेला अनुसरून करिनाने २९ एप्रिल २०१२ मध्ये तिच्या लग्नात हाच शरारा सूट परिधान केला होता. या शरारा सूटमध्ये करिना खूपच सुंदर दिसत होती.