Corn Flour Face Packs : मका खायला सगळ्यांनाच आवडतो. मक्याचे कणीस, मक्यापासून बनवले जाणारे विविध खाद्यपदार्थ हे सगळ्यांनाच खायला आवडतात. मक्यामध्ये भरपूर प्रमाणात पोषकघटक देखील आढळून येतात. त्यामुळे, मका हा आपल्या आरोग्यासाठी अतिशय फायदेशीर आहे.

हिवाळ्यात मक्याची बाजारात मोठी आवक होते. त्यामुळे, या दिवसांमध्ये मक्याचे अधिक सेवन केले जाते. मात्र, तुम्हाला हे माहित आहे का? की आरोग्यासोबतच मका हा आपल्या त्वचेसाठी देखील तितकाच फायदेशीर आहे.

आज आम्ही तुम्हाला मक्याच्या पीठापासून (कॉर्नफ्लोअर) बनवल्या जाणाऱ्या काही सोप्या फेसपॅक्सबद्दल सांगणार आहोत. हे फेसपॅक्स तुम्ही घरच्या घरी बनवू शकता. या फेसपॅक्समुळे तुमची त्वचा उजळण्यास मदत होऊ शकते.

कॉर्नफ्लोअर-नारळाच्या दूधाचा फेसपॅक

डागविरहीत त्वचेसाठी आणि चमकदार चेहऱ्यासाठी हा फेसॅपक अतिशय फायदेशीर आहे. हा फेसपॅक बनवण्यासाठी एका भांड्यात ३-४ चमचे कॉर्नफ्लोअर घ्या. त्यात आता २ चमचे नारळाचे दूध मिसळा आणि चिमूटभर हळद मिक्स करा.

या मिश्रणाची पेस्ट बनवून आता चेहऱ्यावर लावा. १५-२० मिनिटांनी चेहरा थंड पाण्याने धुवा. या फेसपॅकमुळे ब्लॅकहेड्स आणि डार्कसर्कलची समस्या देखील दूर होईल. चांगल्या परिणामांसाठी आठवड्यातून किमान २ वेळा हा फेसपॅक चेहऱ्यावर लावा.

कॉर्नफ्लोअर आणि तांदळाच्या पीठाचा फेसपॅक

त्वचेसाठी तांदळाचे पीठ अतिशय फायदेशीर आहे. हे आपल्या सर्वांनाच माहित आहे. मक्याचे पीठ आणि तांदळाच्या पीठाचा हा फेसपॅक त्वचेवर ग्लो आणण्यास मदत करेल. हा फेसपॅक बनवण्यासाठी एका वाटीत २ चमचे कॉर्नफ्लोअर घ्या. त्यात आता २-३ चमचे तांदळाचे पीठ मिक्स करा.

या मिश्रणात आता चिमूटभर हळद आणि २-३ थेंब गुलाबजल मिसळा. आता या सगळ्याची पेस्ट बनवा आणि चेहऱ्यावर लावा. साधारणपणे २०-२५ मिनिटांनी चेहरा धुवा. चेहरा धुताना कोमट पाण्याचा जरूर वापर करा. अधिक चांगल्या परिणामांसाठी तुम्ही आठवड्यातून २ वेळा या फेसपॅकचा चेहऱ्यावर अवश्य वापर करा.

वरील दोन्ही फेसपॅक्सचा चेहऱ्यावर वापर करण्यापूर्वी एकदा पॅचटेस्ट जरूर करा. यामुळे, तुम्हाला याची कोणती अ‍ॅलर्जी तर नाही ना? हे तुम्हाला कळू शकेल.