Skin Care Tips : आपल्या वयानुसार जसे बदल शरीरात होतात. तसेच, बदल आपल्या चेहऱ्यावर देखील होतात. चेहऱ्यावर बारीक रेषा दिसणे किंवा चेहऱ्याची चमक गायब होणे ही सर्व लक्षणे त्वचेमध्ये कोलेजनचे प्रमाण कमी असल्याचे दर्शवतात. त्यामुळे, त्वचेची चमक आणि लवचिकता कमी होते.

खरं तर कोलेजन हे एक प्रकारचे प्रोटिन आहे. जे त्वचेशी संबंधित असलेल्या समस्यांपासून आपले संरक्षण करते. जेव्हा कोलेजनचे प्रमाण कमी होते, तेव्हा त्वचेच्या अनेक समस्या निर्माण होण्यास सुरूवात होते.

हे कोलेजनचे प्रमाण वाढवण्यासाठी आजकाल अनेक जण विविध प्रकारचे केमिकल प्रॉडक्ट्स वापरतात.परंतु, शरीरात तयार होणाऱ्या कोलेजन नावाच्या प्रोटिनची मात्रा नैसर्गिकरित्या वाढवण्यासाठी तुम्ही आयुर्वेदिक घटकांचा वापर करू शकता.

आवळा

आरोग्यासोबतच, आवळा हा आपल्या त्वचेसाठी आणि केसांसाठी अतिशय फायदेशीर आहे. आवळ्यामध्ये मोठ्या प्रमाणात फायबर्स, व्हिटॅमिन्स आणि खनिजे असतात. आवळ्याचे काही थेंब चेहऱ्यावर लावल्याने त्वचेचा कोरडेपणा दूर होण्यास मदत होते.

कोलेजनसाठी आवळ्याचा असा करा वापर

आवळ्याच्या तेलाचे ४-५ थेंब मुलतानी मातीमध्ये मिसळा. आता, याची पेस्ट चेहऱ्यावर लावल्याने त्वचेवरील डाग, सुरकुत्या आणि ब्लॅक सर्कल्स दूर होण्यास मदत होते. यासोबतच, कोलेजनचे प्रमाण वाढून त्वचेचा रंग ही उजळतो.

गुलाबाच्या पाकळ्या

गुलाबाच्या पाकळ्या आणि गुलाबजल हे आपल्या त्वचेला हायड्रेट ठेवण्याचे काम करतात. त्यामुळे, अनेक प्रकारच्या फेसपॅकमध्ये गुलाबजल आणि गुलाबाच्या पाकळ्यांचा आवर्जून वापर केला जातो.

गुलाबाच्या पाकळ्यांमध्ये मोठ्या प्रमाणात हायड्रेटिंग घटक, जीवनसत्वे, खनिजे आणि अँटिऑक्सिडंट्स असतात. ज्यामुळे, चेहऱ्यावरील सुरकुत्या, काळे डाग दूर होतात.

शिवाय, गुलाबामध्ये असलेले व्हिटॅमिन 'अ' आणि 'क' हे शरीरातील कोलेजनची पातळी वाढवण्याचे काम करतात. त्यामुळे, त्वचेच्या अनेक समस्यांपासून आराम मिळतो.

कोलेजनसाठी गुलाबाच्या पाकळ्यांचा असा करा वापर

८-१० गुलाबाच्या पाकळ्या घ्या. या पाकळ्या आता गुलाबजलसोबत मिक्सरमध्ये बारीक करा. आता, या मिश्रणात तुमच्या अंदाजानुसार मध घाला. आता, हे मिश्रण चेहऱ्यावर लावा. या मिश्रणामुळे चेहऱ्यावर चमक येण्यास मदत होते. अधिक चांगल्या परिणामांसाठी आठवड्यातून २-३ वेळा हा उपाय करा.