Face Wash & Cleanser : त्वचा निरोगी आणि हेल्दी ठेवण्यासाठी त्वचेची खास काळजी घेणे गरजेचे आहे. ऋतू कोणताही असुद्या हिवाळा किंवा उन्हाळा प्रत्येक ऋतूनुसार त्वचेचे स्किनकेअर रूटीन फॉलो करणे गरजेचे आहे.

त्वचा स्वच्छ करण्यासाठी आपण नियमितपणे क्लिंझर किंवा फेसवॉशचा वापर करतो. हे आपल्या चेहऱ्यावरील रोमछिद्रांमधील घाण काढून त्वचा स्वच्छ करण्याचे काम करते. त्वचेसाठी फेस वॉशचा वापर करायचा की क्लिंझरचा हा चॉईस प्रत्येकाचा वेगळा असू शकतो.

आपल्यातील कित्येकांना हा प्रश्न पडतो की, फेस वॉश आणि फेस क्लिंजर या दोन्हींमध्ये नेमका फरक काय आहे? तसेच, या दोन्ही गोष्टींचा वापर चेहऱ्यावर कधी करावा? याबद्दल ही लोकांमध्ये उत्सुकता असते. आज आपण या दोन्ही प्रश्नांची उत्तरे जाणून घेण्याचा प्रयत्न करणार आहोत.

फेसवॉश आणि फेस क्लिंजरमध्ये फरक काय?

आपली त्वचा स्वच्छ करण्याचे काम फेसवॉश आणि फेस क्लिंजर करते. या दोन्हींचा वापर केल्याने चेहरा चांगल्या प्रकारे स्वच्छ होतो. परंतु, फेसवॉश हे एक फोमिंग क्लिंजर आहे तर फेस क्लिंजर किंवा क्लिंजींग मिल्क हे नॉन-फोमिंग आहे.

फेस वॉश चेहऱ्याला लावल्यानंतर चेहरा लगेच धुतला जातो. मात्र, क्लिंजिंग मिल्क किंवा फेस क्लिंजर चेहऱ्याला लावल्यानंतर ते कॉटनच्या सहाय्याने चेहऱ्यावरून पुसून काढले जाते. चेहरा धुतला जात नाही.

काही फेसवॉश हे हार्श असू शकतात, त्यामुळे, तुमच्या चेहऱ्यावर नकारात्मक प्रभाव दिसू शकतो. या उलट फेस क्लिंजर किंवा क्लिजिंग मिल्क हे माईल्ड असतात. त्यामुळे, चेहऱ्याची स्वच्छता करण्यासाठी प्रामुख्यांने क्लिंजर किंवा क्लिंजिंग मिल्कचा वापर केला जातो.

फेसवॉश आणि फेस क्लिंजरचा वापर कधी करावा?

फेसवॉश आणि फेस क्लिंजरचा वापर हा तुमच्या रोजच्या डेली रूटीनवर अवलंबून असतो. जर तुम्ही सकाळी फोमिंग फेसवॉशचा वापर केला असेल परंतु, घरी येताना तुम्हाला ट्रॅफिकचा सामाना करावा लागल्यामुळे चेहऱ्यावर धूळ, घाण आण प्रदूषणाचे कण जमा झाले आहेत, तर अशा परिस्थितीमध्ये तुम्ही आधी क्लिंजर आणि मग फेसवॉशचा वापर करणे योग्य ठरेल.

यासोबतच तुम्ही रात्री झोपताना चेहरा स्वच्छ करण्यासाठी फेस क्लिंजरचा वापर करणे चांगले राहील. तसेच, मेकअप काढण्यासाठी आधी फेस क्लिंजरचा वापर करणे योग्य ठरेल. कारण, फेस क्लिंजर माईल्ड असल्यामुळे ते त्वचेला मॉईश्चराईझ करते आणि त्वचा खोलवर साफ करण्याचे काम करते.