कोणत्याही इमारतीच्या कंस्ट्रक्शन साईटवर गेलात की तिथे मोठमोठे मशीन पाहायला मिळतात. यात खोदकामसाठी वापरण्यात येणारं जेसीबी (JCB) तर साऱ्यांनीच पाहिलं असेल. अवजड सामान उचण्यापासून मोठे खड्डे खणण्यापर्यंत जेसीबीचा वापर केला जातो. खरं तर या मशीनचं 'बॅकहो लोडर' असं नाव आहे. परंतु, आज प्रत्येक जण त्याला जेसीबी (JCB ) याच नावाने ओळखतो. जेसीबी हे मशीनचं नाव नसून कंपनीचं नाव आहे, हेदेखील फार कमी जणांना माहित आहे. आपण कायम बघतो की या जेसीबीचा (बॅकहो लोडर) रंग हा पिवळाच असतो. पण, हा एकच रंग या मशीनला का असतो हे जाणून घेण्याचा प्रयत्न फारसा कोणी केला नसेल. म्हणूनच, जेसीबीचा रंग पिवळा (yellow) का असतो हे जाणून घेऊयात. (why-jcb-machine-is-yellow-in-colour)

का असतो जेसीबीचा रंग पिवळा?

JCB हे एका कंपनीचं नाव असून ही कंपनी अनेक अवजड मशीनची निर्मिती करते. हे मशीन खासकरुन कंस्ट्रक्शन साईटवर वापरली जातात. त्यातच बॅकहो लोडर हे कंपनीचं एक मशीन असून ते खोदकाम व अवजड वस्तू उचलण्यासाठी मदत करते. कंपनीने प्रथम तयार केलेल्या बॅकहो लोडरला निळा व लाल रंग दिला होता. परंतु, कालांतराने या रंगात बदल करुन तो पिवळा देण्यात आला. व्हिजिबिलिटीसाठी पिवळा रंग योग्य असल्यामुळे या मशीनच्या रंगात बदल करण्यात आला.

पिवळा रंग लांबून सहज दिसून येतो. त्यामुळे कंस्ट्रक्शन साईटवर काम सुरु असतांना अंधारात, धुक्यात किंवा धुळ, माती असतांना सुद्धा हे मशीन सहज दिसून येतं. म्हणूनच, या मशीनचा रंग बदलून पिवळा करण्यात आला. विशेष म्हणजे कंस्ट्रक्शन साईटवर काम करणाऱ्या कामगारांचे हेल्मेटदेखील पिवळ्या रंगाचे असतात.