सगळ्यात लहान किटक कोणता असा प्रश्न विचारला तर हमखास डोळ्यासमोर मुंगी येईल. दिसायला अत्यंत लहानशी असणारी ही मुंगी चावल्यावर मात्र, प्रचंड वेदना होतात. मुंग्यांमध्ये दोन प्रकार आहेत हे साऱ्यांनाच ठावूक असेल. एक काळी मुंगी आणि दुसरी लाल मुंगी. या दोन्ही मुंग्या चावतात. परंतु, लाल मुंगी चावल्यानंतर प्रचंड वेदना होतात. मुंगी चावल्यानंतर प्रभावित झालेला भाग लाल होतो आणि तेथे सतत दाह निर्माण होतो. यात अनेकदा मुंगी का चावते? किंवा मुंगी नेमकी कशी चावते ?हा प्रश्न अनेकांना पडतो. यात काहींच्या मते, स्वत: चं रक्षण करण्यासाठी मुंगी चावते असं म्हटलं जातं. मात्र, मुंगी चावण्याचं खरं कारण अत्यंत निराळं आहे. त्यामुळेच मुंगी किंवा मोठे काळे मुंगळे का चावतात ते जाणून घेऊयात.

साधारणपणे कोरड्या किंवा दाराच्या, खिडक्यांच्या फटीमध्ये मुंग्या त्यांचं वास्तव्य निर्माण करत असतात. या मुंग्या एकट्या न राहता, एक जुटीने राहतात. त्यामुळे अनेकदा आपला स्पर्श झाल्यावर त्या कडाडून चावतात. पण, या मुंग्या चावल्यावर प्रभावित जागेवर दाह का होते हे पाहुयात.

मुंग्यांच्या पोटाजवळ एक नांगी असते. या नांगीजवळ फॉर्मिक अॅसिडच्या ग्रंथी असतात. ज्यावेळी मुंगी आपल्याला चावते, त्यावेळी ती तिचं तोंड उघडते आणि आपल्या त्वचेमध्ये खोलपर्यंत त्याचा दंश करते. मुंगी दंश करत असताना तिच्या नांगीतील फॉर्मिक अॅसिड आपल्या त्वचेवर पडतं. यात मुंगीचा दंश आणि हे अॅसिड पडणे या दोन्ही क्रिया एकाच वेळी होतात. त्यामुळे मुंगी चावल्यावर प्रभावित जागेवर प्रचंड दाह निर्माण होते.

दरम्यान, लाल मुंगीप्रमाणेच काळी मुंगीदेखील चावते. मात्र, तिच्या नांगीमध्ये असलेले फॉर्मिक अॅसिडची दाहकता लाल मुंगीच्या फॉर्मिक अॅसिडच्या तुलनेत कमी असते. त्यामुळे काळी मुंगी चावल्यानंतर त्याचा परिणाम फारसा जाणवत नाही.