राज्याचे लक्ष्य लागून राहिलेल्या बारामती लोकसभा मतदारसंघासाठी उमेदवारी अर्ज दाखल करण्याची मुदत शुक्रवारी संपुष्टात आली. महाविकास आघाडी आणि महायुतीच्या दोन प्रमुख उमेदवारांसह या मतदारसंघात एकूण ५१ उमेदवारांनी अर्ज भरले आहेत. उद्या (शनिवारी) उमेदवारी अर्जांची छाननी होणार आहे, तर उमेदवारी अर्ज माघारी घेण्याची मुदत सोमवारपर्यंत (ता. २२) आहे. त्यामुळे सोमवारी दुपारी बारामती लोकसभेचे चित्र स्पष्ट होणार आहे.

बारामती मतदारसंघासाठी १२ एप्रिलपासून उमेदवारी अर्ज भरण्यास सुरुवात झाली. या मतदारसंघातून महाविकास आघाडीतर्फे राष्ट्रवादी काँग्रेस शरदचंद्र पवार पक्षाकडून सुप्रिया सुळे यांनी, तर महायुतीतर्फे राष्ट्रवादी काँग्रेसकडून सुनेत्रा पवार यांनी उमेदवारी अर्ज दाखल केला आहे, तसेच दोन्ही पक्षांकडून खबरदारीचा उपाय म्हणून डमी (पर्यायी) उमेदवार म्हणून राष्ट्रवादी काँग्रेसकडून उपमुख्यमंत्री अजित पवार यांनी उमेदवारी अर्ज भरला आहे, तर राष्ट्रवादी काँग्रेस शरदचंद्र पवार पक्षाकडून सचिन दोडके यांनी उमेदवारी अर्ज भरला आहे.

यांसह इतर ४९ अपक्ष उमेदवारांनी अर्ज भरले आहेत. छाननीनंतर अंतिम उमेदवारीची यादी शनिवारी प्रसिद्ध केली जाणार आहे, तर उमेदवारी अर्ज माघारी घेण्याच्या मुदतीनंतर निवडणुकीचे चित्र स्पष्ट होणार आहे. पुणे, मावळ आणि शिरूर मतदारसंघासाठी उमेदवारी अर्ज दाखल करण्यास शुक्रवार (ता. १९) सुरुवात झाली. या तीनही मतदारसंघासाठी उमेदवारी अर्ज दाखल करण्याची अंतिम मुदत २५ एप्रिलपर्यंत आहे. आतापर्यंत पुणे मतदारसंघातून पाच उमेदवारांनी अर्ज भरले आहेत.