Atal Bihari Vajpayee:

लोकसभा निवडणुकीत नेत्यांच्या जोरात सभा सुरु आहेत. अनेक सभांना गर्दी असते तर काही सभा रिकाम्या असतात...मात्र अशी एक रिकामी सभा पाहून माजी पंतप्रधान अटल बिहारी वाजपेयी संतापले होते...पण ते संयमी देखील होते...कुणावर आरडाओरड न करता...ते प्रचारासाठी स्वत: मैदानात उतरले... हा किस्सा आहे.. १९७२ मधील...

राज्य बिहार, जिल्हा मुंगेर, गाव तारापूर...येथे १९७२ मध्ये अधिवक्ता जयकिशोरसिंह निवडणुकीच्या मैदानात होते. यासाठी अटल बिहारी वाजपेयी यांची सभा आयोजीत करण्यात आली होती. अटलजी सभास्थळी पोहचले पण कार्यकर्त्यांची तयारी पाहून योग्य प्रचार झाला नसल्याचे त्यांच्या लक्षात आले.

अटलीजींनी कार्यकर्त्यांना व्यासपीठाची तयारी करण्यास सांगितले आणि ते लोकांना बोलवण्यासाठी मैदानात उतरले. अटलजी एका कार्यकर्त्यांवा घेऊन बाजारात गेले. त्यांनी एक माईक विकत घेतला आणि एक रिक्षा भाड्याने घेतली.

वाजपेयी यांनी रिक्षावर माईक बांधला आणि डोक्यावर गमछा बांधला. तारापूर शहरात अटलजी फिरले. यावेळी ते माईकवरुन लोकांना आवाहन करत होते. हळू हळू सभास्थळी गर्दी जमू लागली. त्यांनंतर वाजपेयी भाषणासाठी मंचावर आले तेव्हा लोकांना समजले की रिक्षातून प्रचार करणारी व्यक्ती म्हणजे वाजपेयीच होते.

या गोष्टीला ५२ वर्ष पूर्ण  झाले. पण स्वतःच्या सभेचा प्रचार स्वतःच रिक्षातून करण्याची अटलजींच्या कल्पनेची आजही लोकांना गंमत वाटते.