पुणेः बारामती लोकसभा मतदारसंघातील राष्ट्रवादी काँग्रेस महायुतीच्या उमेदवार सुनेत्रा पवार या अब्जाधीश असून, सुनेत्रा पवार, अजित पवार आणि कुटुंबीयांची एकत्रित मालमत्ता १२३ कोटी ४६ लाख १७ हजार ७५८ रुपये इतकी आहे.

सुनेत्रा पवार यांनी आज (ता. १८) त्यांचा निवडणूक उमेदवारी अर्ज दाखल केला. त्यावेळी त्यांनी सादर केलेल्या प्रतिज्ञापत्रातून ही माहिती समोर आली आहे आहे. सुनेत्रा पवार यांनी वाणिज्य शाखेतून पदवी प्राप्त केली असून, शेती आणि व्यवसाय करतात.

त्यांच्या हातामधील रोख रक्कम ३ लाख ९६ हजार इतकी आहे. बॅंकेमध्ये ५ कोटी ३० लाख ७५ हजार रुपयांच्या ठेवी आहेत. ६३ लाख ७३ हजार ३६० रुपयांचे दागिणे आहेत, यामध्ये ७५ किलो चांदी, एक किलो सोने, हिऱ्याच्या दागिन्यांचा समावेश आहे. त्यांच्या नावावर एक ट्रॅक्टर, दोन ट्रेलर आहेत, पण त्यांच्याकडे एकही कार नाही. अजित पवार यांच्या नावावर तीन ट्रेलर, एक ट्रॅक्टर आणि दोन कार आहेत, या वाहनांचे एकूण मूल्य ८६ लाख ४२ हजार १०२ रुपये इतके आहे. पवार कुटुंबीयांची एकूण जंगम मालमत्ता ही २९ कोटी ६५ लाख २९ हजार ८१३ रुपयांची आहे.

सुनेत्रा पवार यांच्या नावावर बारामतीतील सोनगाव, ढेकळवाडी, वंजारवाडी, जळोची, गोडांबेवाडी येथे ४५ एकर जमीन आहे. तर अजित पवार यांच्या नावावर काटेवाडी, सोनगाव व ढेकळवाडी या तीन ठिकाणी मिळून साडेचार एकर जमीन आहे, त्याचे चालू बाजारभावानुसार एकूण मूल्य १२ कोटी २१ लाख रुपये इतके आहे. काटेवाडी, कल्याणीनगर, औंध, बिबवेवाडी येथे प्रत्येकी एक आणि मुंबई येथे दोन घरे आहेत. स्थावर मालमत्तेचे एकूण मूल्य ९३.८० कोटी रुपये इतके आहे. तसेच पवार यांनी नणंद सुप्रिया सुळे यांना ३५ लाख तर शरद पवार यांच्या पत्नी प्रतिभा पवार यांना ५० लाख, अजित पवार यांना ६३ लाख २० हजार रुपयांचे कर्ज दिले आहे, असे प्रतिज्ञापत्रात नमूद केले आहे.

अशी आहे मालमत्ता

• सोने - ६३.७३ लाख

• स्थावर मालमत्ता -९३.८० कोटी

• बॅंकेतील ठेवी - ५.३० कोटी

• कर्ज - १६.८६ कोटी

• वाहने - ८६.४२ लाख

• शेअर्स - ६६.४८ लाख

• एकूण - १२३.४६ कोटी