नवी दिल्ली : यंदाच्या लोकसभा निवडणुकीदरम्यान आत्तापर्यंत 8,889 कोटी रुपयांची रोकड, 4 हजार कोटी रुपयांचं ड्रग्ज आणि इतर मोठ्या प्रमाणावर प्रलोभनं म्हणून देण्यात आलेल्या वस्तू निवडणूक आयोगानं जप्त केल्या आहेत. शनिवारी निवडणूक आयोगानं स्वतः ही माहिती तपशीलवार माहिती जाहीर केली. (Cash of value 8889 crore rs 4000 crore rupees drugs seized during Lok sabha Election 2024 by ECI)

निवडणूक आयोगानं म्हटलं की, ड्रग्ज, दारु, सोनं, मोफत वाटप करण्यात आलेल्या वस्तू आणि विविध ठिकाणी छापेमारीत मिळालेल्या रोख रकमा निवडणुकांवर परिणाम करत असतात. यामध्ये काही वस्तू या थेट प्रलोभनं म्हणून देण्यात येतात तर काही इतर स्वरुपात दिली जातात.

या निवडणुकीत आयोगानं यंदा नशेचे पदार्थ, ड्रग्ज यांच्या जप्तीवर विशेष भर दिला होता. छापेमारीनंतर आकडेवारीचं विश्लेषण केल्यानंतर हे लक्षात आलं की, राज्य आणि केंद्र शासित प्रदेशाला जोडणारा जो मार्ग आहे ते वेगानं ड्रग्ज सेवनाचे क्षेत्र बनत चालले आहेत.

दरम्यान, गुजरात दहशतवादविरोधी पथक, नार्कोटिक्स कन्ट्रोल ब्युरो आणि भारतीय तटरक्षक दलानं संयुक्त मोहिमेद्वारे तीन दिवसांत ८९२ कोटी रुपये किंमतीची तीन नशेची औषधं जप्त केली आहेत. आयोगानं सांगितलं की, ८४९.१५ कोटी रुपये रोख, ८१४.८५ कोटींची दारु, ३,९५८.८५ कोटी रुपयांचं ड्रग्ज आणि १२६०.३३ कोटी रुपये किंमतीचे सोनं नाणं जप्त केलं आहे.