छत्रपती संभाजी नगरः मागच्या वेळी माझ्या नशिबात लोकसभा होती, परंतु डावपेच आखून मला दूर ठेवलं गेलं. यावेळीही अनेक ज्योतिषी आणि पंडितांनी नशिबात लोकसभा असल्याचं सांगितलं आहे. असं सांगत उबाठा गटाचे नेते चंद्रकांत खैरे यांनी छत्रपती संभाजी नगरमधून निवडणूक लढवण्याची इच्छा व्यक्त केली आहे.

चंद्रकांत खैरेंमुळे दहा वर्षांपासून मी लोकसभेसाठी दूर राहिलो, यावेळी आपल्याला पक्षाने तिकिट द्यावं, अशी मागणी विधान परिषेदेचे विरोधी पक्षनेते अंबादास दानवे यांनी केली आहे. त्यावर चंद्रकांत खैरेंनी म्हटलंय की, मी गुरु असून ते माझे शिष्य आहेत. गुरु काही डाव हातचे ठेवत असतात.

काय म्हणाले चंद्रकांत खैरे

अंबादास दानवे हे विरोधी पक्षनेते आहेत. ही मोठी पोस्ट आहे. त्यांनी लोकसभेला उभं राहू नये, असा सल्ला मी दिला नाही. परंतु पक्षाने यावेळी मला संधी द्यावी, अशी माझी मागणी आहे. मला शिवसेनाप्रमुखांनी सांगितलं होतं, तुझ्या नशिबात असेल तर द्यावं लागेल अन् नशिबात नसेल नाही द्यावं लागणार.

''मागच्यावेळी माझ्या नशिबात लोकसभा होती, परंतु डावपेच आखून मला दूर ठेवलं गेलं. यावेळीही माझ्या नशिबात लोकसभा आहे. मी धार्मिक वृत्तीचा माणूस आहे. मी अनेक ज्योतिषांकडे आणि पंडितांकडे चौकशी केली आहे. त्यांच्या मते माझ्या नशिबात लोकसभा आहे.'' असं खैरे म्हणाले.

ते पुढे म्हणाले की, लोकांचीही हीच मागणी आहे, त्यामुळे मला खासदार व्हायचं आहे. इम्तियाज जलील यांनी काहीही काम केलेलं नाही. दिल्लीत जे मी काम केलं ते कुणीही करु शकत नाही. ते इथपर्यंत आलेही नसते, पण मी कुणाचं तोंड बंद करु शकत नाही.

''अंबादास दानवे हा माझा शिष्य आहे. पण गुरुही काहीना काही हातचं ठेवतात. आम्ही कुटुंबातले आहोत. उद्धवजी आमच्यावर मोठ्या प्रमाणावर प्रेम करतात.'' असं म्हणत खैरेंनी लोकसभा लढवण्याची तीव्र इच्छा बोलून दाखवली आहे.

खैरे मला डावलण्याचा प्रयत्न करतात- दानवे

''मला शिंदेंकडे जायचं असतं तर मी तेव्हाच गेलो असतो. मी शिंदे गटात नाही, शिंदे गट पाच ते सहा महिने राहणार आहे. इच्छा व्यक्त करणे आपला अधिकार आहे. काही गोष्टी उद्धव ठाकरेंच्या कानावर घातल्या आहेत. दुसरी बाजू मांडणं गरजेचं होतं. चंद्रकांत खैरे मला नेहमी डावलण्याचा प्रयत्न करतात. पण, मी उद्धव ठाकरेंसाठी काम करतो. त्यामुळे खैरे काय करतात याबाबत मला देणंघेणं नाही.'' असं अंबादास दानवे म्हणाले.