निपाणी : राष्ट्रवादी काँग्रेस हा इंडिया आघाडीतील घटक आहे. त्यामुळे लोकसभा निवडणुकीत राष्ट्रवादी काँग्रेस इंडिया आघाडीच्या प्रचारात सक्रिय राहणार आहे. राष्ट्रवादी पक्षाचे (NCP) स्वतंत्र अस्तित्व ठेवून प्रचाराची धुरा राबविण्यात येणार आहे. तसेच निपाणीसह सातही मतदारसंघातून काँग्रेसच्या उमेदवार प्रियांका जारकीहोळी (Priyanka Jarkiholi) यांना मताधिक्य देणार असल्याचे नेते उत्तम पाटील (Uttam Patil) यांनी सांगितले.

निपाणीतील राष्ट्रवादी कार्यालयात आयोजित नेते मंडळ व कार्यकर्त्यांच्या बैठकीत ते बोलत होते. माजी आमदार प्रा. सुभाष जोशी (Subhash Joshi), अशोककुमार असोदे यांनीही यावेळी मार्गदर्शन केले. उत्तम पाटील सध्या शरद पवार (Sharad Pawar) यांच्या पक्षात कार्यरत आहेत. मागील निपाणी विधानसभा निवडणूक त्यांनी लढवली होती, त्यात त्यांचा माजी मंत्री शशिकला जोल्लेंविरुद्ध थोडक्या मतांनी पराभव झाला होता.

बैठकीस नगरसेवक रवींद्र शिंदे, संजय सांगावकर, शौकत मनेर, दीपक सावंत, संजय पावले, दिलीप पठाडे, शेरू बडेघर, राजू पाटील-अक्कोळ, प्रा. बाळासाहेब सूर्यवंशी, गोपाळ नाईक, निरंजन पाटील-सरकार, शिरीष कमते, इम्रान मकानदार, चेतन स्वामी, विष्णू कडाकणे व कार्यकर्ते उपस्थित होते. गेल्या काही दिवसांपासून उत्तम पाटील कोणाला पाठिंबा देणार याची उत्सुकता लागून राहिली होती. मात्र, आज त्यांनी भूमिका जाहीर करत काँग्रेसच्या उमेदवार प्रियांका जारकीहोळी यांना पाठिंबा दर्शविला असून चिक्कोडी लोकसभेचं चित्र बदलण्याची शक्यता आहे.