बंगळूर : महाराष्ट्र एकीकरण समितीची (Maharashtra Ekikaran Samiti) मते भाजपला (BJP) मिळाल्याने आपला मुलगा मृणाल हेब्बाळकर यांचा बेळगाव लोकसभा मतदारसंघात पराभव झाल्याचे महिला आणि बालविकासमंत्री लक्ष्मी हेब्बाळकर (Lakshmi Hebbalkar) यांनी मान्य केले. उपमुख्यमंत्री डी. के. शिवकुमार यांची भेट घेतल्यानंतर लक्ष्मी हेब्बाळकर यांनी ही माहिती दिली.

मृणाल हेब्बाळकर यांनी काँग्रेसच्या (Congress) उमेदवारीवर निवडणूक लढवली होती. त्यांचा भाजपचे उमेदवार आणि माजी मुख्यमंत्री जगदीश शेट्टर (Jagadish Shettar) यांच्याकडून १.७८ लाख मताधिक्याने पराभव झाला. बेळगावमध्ये (Belgaum Lok Sabha Elections) तिरंगी लढत झाली, पण यावेळी भाजप आणि महाराष्ट्र एकीकरण समिती एकत्र आल्याचे दिसत आहे, असे हेब्बाळकर म्हणाल्या.

बेळगाव ग्रामीण मतदारसंघात विधानसभा निवडणुकीत समिती उमेदवाराला ४५ हजार मते मिळाली. बेळगाव लोकसभा पोटनिवडणुकीत सतीश जारकीहोळी यांना ४ लाख, तर महाराष्ट्र एकीकरण समितीच्या उमेदवाराला १.३० लाख मते मिळाली. यावेळी म. ए. समितीला उमेदवाराला केवळ नऊ हजार मते मिळाली आहेत.

बेळगाव ग्रामीण विधानसभा मतदारसंघात भाजपने आघाडी मिळविल्याचे लक्ष्मी हेब्बाळकर यांनी मान्य केले. २०१८ मध्ये आपल्याला ५२ हजार मतांच्या फरकाने विजयी झाले. वर्षभरानंतर झालेल्या लोकसभा निवडणुकीत माझ्या मतदारसंघातून सुरेश अंगडी ७९ हजार मतांनी आघाडीवर होते. २०२३ मध्ये मी ५९ हजार मताधिक्याने विजयी झाले. त्यामुळे मतदारांचा मूड निवडणुकीपेक्षा वेगळा असतो, असे त्या म्हणाल्या.

लोकसभा मतदारसंघातील उमेदवार निवडीची जबाबदारी काँग्रेस हायकमांडने संबंधित मंत्र्यांवर सोपविली होती. पक्षाच्या उमेदवारांचा पराभव झाल्यास मंत्रिपदावर गंडातर येईल, असा इशाराही दिला त्यामुळे हेब्बाळकर आता अडचणीत आल्याची चर्चा आहे. बेळगाव लोकसभा मतदारसंघात बेळगाव ग्रामीण, बेळगाव उत्तर आणि बेळगाव दक्षिण मतदारसंघात मराठी मतदारांचे स्पष्ट बहुमत आहे. परंतु रेंगाळलेला सीमाप्रश्न व राजकीय नेत्यांनी मराठी मतदारांना विविध मार्गाने आकर्षित केल्याने दोन-तीन विधानसभा निवडणुकीत समिती उमेदवारांचा पराभव झाला.

मराठी बहुल मतदारसंघात पक्षवार पडलेली मते अशी

मतदारसंघ भाजप काँग्रेस मतांची आघाडी

• बेळगाव ग्रामीण १,२४,९७० ७४,४४१ ५०,५२९

• बेळगाव दक्षिण १,१९,२४९ ४६,०२९ ७३,२२०

• बेळगाव उत्तर ८३,९३८ ८१,५३७ २,४०१