धाराशिव : धाराशिवमध्ये मतदान केंद्राबाहेर एका राजकीय कार्यकर्त्याची हत्या करण्यात आल्याची धक्कादायक घटना समोर आली आहे. राजकीय वादातून ही घटना घडल्याचं सोशल मीडियावर बोललं जात आहे. पण वैयक्तिक वादातून हा प्रकार घडल्याचं पोलिसांनी सांगितलं आहे. (Dharashiv Political Murder Gaurav Naiknavare case has been registered against four people)

पोलिसांच्या माहितीनुसार, भूम तालुक्यातील पाठसांगवी इथं दोन गटात झालेली मारहाणीची घटना ही वैयक्तिक कारणावरुन झाल्याची पोलिसांनी माहिती दिली आहे. मतदान केंद्राच्याबाहेर गौरव उर्फ लाल्या अप्पा नाईकनवरे (वय २३) आणि समाधान नानासाहेब पाटील (वय २७) यांच्यात वैयक्तिक कारणावरुन वाद झाला. यानंतर दोघांच्या वैयक्तिक वादातून धारदार हत्यारानं गौरव नाईकनवरे यानं समाधान पाटील याच्यावर वार केले, यात तो गंभीर जखमी झाल्यानं त्याचा मृत्यू झाला. (Latest Marathi News)

दरम्यान, खून झालेला तरुण हा ठाकरे गटाचा कार्यकर्ता असल्याची माहिती सुत्रांकडून मिळते आहे. पण पोलिसांनी हा दावा नाकारला आहे. ही घटना मतदानाच्या अथवा निवडणुकीच्या संदर्भात घडलेली नसल्याचं पोलिसांनी म्हटलं आहे. तसेच आता या मतदान केंद्रावर मतदान सुरळीत सुरु असल्याची माहिती पोलीस अधीक्षक अतुल कुलकर्णी यांनी दिली. (Marathi Tajya Batmya)