सोलापूर : मतदार यादीत नावच नसल्याने किंवा जिवंत असूनही मतदार यादीत मयत म्हणून नोंद झाल्याने अनेकांना या लोकसभा निवडणुकीत मतदान करता आले नाही. आता अशा मतदारांना ४ जूननंतर ‘वोटर हेल्पलाइन’वर फॉर्म नंबर सहा भरून द्यावा लागणार आहे. त्यानंतरच त्या मतदारांची नावे मतदार यादीत समाविष्ट होणार आहेत.

सोलापूर व माढा लोकसभा या दोन्ही लोकसभा मतदारसंघातील अनेकांना ७ मे रोजी मतदान करता आले नाही. मतदारांकडे मतदार ओळखपत्र आहे, मागच्यावेळी मतदान केले, पण यंदा यादीत नावच नव्हते. दुसरीकडे अनेकांना मी जिवंत आहे, तुमच्यासमोर उभा असलेला तो मीच आहे, असे ठणकावून सांगावे लागले.

मात्र, नियमानुसार त्यांना मतदानाचा हक्क बजावता आला नाही. अशा शेकडो मतदारांना मतदान न करताच परतावे लागल्याचे ७ मे रोजी पाहायला मिळाले. तसे आरोप देखील अनेकांनी केले व जिल्हा प्रशासनाकडे काही तक्रारी देखील प्राप्त झाल्या.

आता ती नावे नेमकी मतदार यादीतून वगळलीच कशी, जिवंत असतानाही मतदार यादीत मयत म्हणून नोंद लागली कशी, या बाबींची चौकशी होणार आहे. तरीपण, यादीतून वगळलेल्या मतदारांना पुन्हा यादीत येण्यासाठी फॉर्म सहा भरावाच लागणार आहे.

दोन कागदपत्रे अपलोड केल्यास ७ दिवसांत समाविष्ट होईल नाव

ज्यांचे नाव मतदार यादीतून वगळले गेले आहे किंवा जिवंत असूनही मयत नोंदविण्यात आले आहे, त्यांनी स्वत:चे आधारकार्ड किंवा जन्माचा एक पुरावा आणि रहिवासी पुरावा (वीजबिल किंवा इतर) वोटर हेल्पलाइन या संकेतस्थळावर अपलोड करावा. त्यानंतर सात दिवसांत संबंधित मतदाराचे नाव नव्याने समाविष्ट होते. पण, ही सुविधा ४ जूननंतर (लोकसभा निवडणुकीचा निकाल लागून आचारसंहिता संपल्यावर) सुरु होणार आहे.

मतदार यादीतून नावे वगळण्यात आल्याच्या तक्रारींची पडताळणी केली जाणार आहे. पण, मतदार यादीतून नाव वगळलेल्या मतदारांना आचारसंहिता संपल्यानंतर ‘वोटर हेल्पलाइन’ या संकेतस्थळावर जावून फॉर्म नं. सहा भरून पुन्हा यादीत नाव समाविष्ट करता येणार आहे.

- गणेश निऱ्हाळी, उपजिल्हा निवडणूक अधिकारी, सोलापूर