अमरोहा (उत्तरप्रदेश)ः ‘सध्या उत्तरप्रदेशात ‘दो शहजादे की जोडी’ या चित्रपटाचे चित्रीकरण सुरू असले तरीसुद्धा लोकांनी मात्र हा सिनेमा कधीच नाकारला आहे,’ अशा शब्दांत पंतप्रधान नरेंद्र मोदी यांनी काँग्रेसचे नेते राहुल गांधी आणि समाजवादी पक्षाचे अध्यक्ष अखिलेश यादव यांच्यावर निशाणा साधला.

ते येथे आयोजित सभेत बोलत होते. पंतप्रधान मोदी म्हणाले, ‘‘ ही मंडळी नेहमीच उत्तरप्रदेशातील जनतेकडे मते मागण्यासाठी येतात पण प्रत्यक्षात मात्र तेच घराणेशाही, भ्रष्टाचार आणि लांगूलचालन या प्रोत्साहन देण्याचे काम करतात.’’ मोदींनी यावेळी स्थानिक उमेदवार दानिश अली यांच्यावरही टीका केली. दानिश यांनीच भारत मातेच्या जयघोषाला आक्षेप घेतला होता असे मोदी म्हणाले.

‘‘ जी व्यक्ती भारत मातेच्या जयघोषालाच आक्षेप घेते ती संसदेमध्ये शोभून दिसेल का? अशा लोकांना आपण संसदेमध्ये जाऊ द्यायला हवे का? ’’ असे सवाल पंतप्रधानांनी उपस्थितांना केले. मोदी म्हणाले, ‘‘ समाजवादी पक्ष आणि काँग्रेस या दोघांनी देखील रामलल्लाच्या प्राणप्रतिष्ठा सोहळ्याचे निमंत्रण नाकारले होते. केवळ मतपेढीवर लक्ष ठेवून असलेल्या या मंडळींनी रामाला विरोध केला होता. दुसऱ्या बाजूला ज्यांनी सर्वोच्च न्यायालयात बाबरी मशिदीच्या बाजूने युक्तिवाद केला होता ती मंडळी मात्र या सोहळ्याला उपस्थित होती. विरोधकांचे निमंत्रण नाकारून देखील समाधान झाले नाही. त्यामुळेच त्यांनी राम मंदिर आणि सनातन धर्माचा अवमान केला. समाजवादी पक्षाने मतपेढीसाठी रामभक्तांना पाखंडी म्हटले. इंडिया आघाडीत असलेली मंडळी सनातन धर्माचा द्वेष करतात.’’

त्यांच्याकडून कृष्णाचा अवमान

‘‘ सध्या समुद्रातळाशी असलेल्या कृष्णभूमी द्वारकेला जाऊन मी प्रार्थना केली तेव्हा काँग्रेसच्या युवराजांनी समुद्राखाली प्रार्थना करण्यासाठी काहीही नसल्याचे नमूद केले होते. केवळ मतपेढीच्या राजकारणासाठी ते आता आमच्या श्रद्धेला देखील नाकारत आहेत,’’ असे पंतप्रधान मोदी म्हणाले. ‘‘ सध्या बिहारमध्ये जे सत्तेत आहेत ते स्वतःला यदुवंशीय म्हणवितात. उत्तरप्रदेशातील काही मंडळी त्याचाच फायदा घेतात मग ही मंडळी कृष्णाचा अवमान करणाऱ्याशी कशी काय मैत्री करू शकतात?’’ असा सवालही पंतप्रधानांनी केला.