नवी दिल्ली / अकोला : मोदींच्या विकासाची गॅरंटी देत सुरू झालेला भाजपचा प्रचार व्हाया हिंदुत्वाच्या मुद्द्यावरून आरक्षणावर येऊन ठेपला आहे. राजस्थानातील प्रचारसभेत पंतप्रधान मोदी यांनी आज काँग्रेस धर्माच्या आधारावर आरक्षणात वाढ करण्याचा विचार करत असून अनुसूचित जाती-जमातींचे (एससी-एसटी) आरक्षण काढून ते मुस्लिमांना देण्याचा त्यांचा डाव असल्याचे मोदींनी म्हटले आहे.

केंद्रीय गृहमंत्री अमित शहा यांनीही अकोल्यातील सभेत तोच धागा पकडून एससी-एसटी आणि ओबीसींचे आरक्षण काढले जाणार नाही ही मोदींची गॅरंटी असल्याचे नमूद केले. मोदी आणि शहा यांच्या विधानामुळे भाजपच्या प्रचारात आरक्षणाचे वारे वाहू लागल्याचे चित्र पाहायला मिळत आहे. तत्पूर्वी काँग्रेसने देशातील आरक्षण व्यवस्था संपविण्याचा भाजपचा कट असल्याचा आरोप केला होता.

सर्वपक्षीय प्रचाराचा धुरळा

मंगळवार हा राज्यातील ‘प्रचार डे’ ठरला. सर्वपक्षीय नेत्यांनी जोर लावल्याने राज्यभर प्रचाराचा धुरळा उडाला. केंद्रीय गृहमंत्री अमित शहा, ठाकरे गटाचे प्रमुख उद्धव ठाकरे आणि ज्येष्ठ नेते शरद पवार यांच्या तोफा विविध ठिकाणावर धडाडल्या. उद्या बुधवारी दुसऱ्या टप्प्यातील प्रचार संपत असून शुक्रवारी (ता.२६) पश्चिम विदर्भातील बुलडाणा, अकोला, अमरावती, वर्धा, यवतमाळ-वाशीम आणि मराठवाड्यातील हिंगोली, नांदेड आणि परभणी अशा आठ मतदारसंघांत मतदान होत आहे.

ही निवडणूक लोकशाही विरुद्ध हुकूमशाही अशी आहे. लोकशाही वाचविण्यासाठी महाविकास आघाडीच्या मागे ताकद उभी करा. परभणी शिवसेनेचा बालेकिल्ला असून तो अबाधित राहीन. परभणी पैशाने विकत घेतली जाऊ शकत नाही. वादाला अंगावर घेण्यासाठी मर्दाची छाती लागते ती आमच्याकडे आहे.

- उद्धव ठाकरे, ठाकरे गटाचे प्रमुख (परभणीतील सभेतून)