फलटण शहर : माढा लोकसभा मतदारसंघातून (Madha Loksabha Constituency) उमेदवारी जाहीर केलेले राष्ट्रीय समाज पक्षाचे अध्यक्ष महादेव जानकर (Mahadev Jankar) यांनी धक्कातंत्राचा अवलंब करीत येथे राष्ट्रवादी काँग्रेसचे (अजित पवार) सातारा जिल्हाध्यक्ष संजीवराजे नाईक-निंबाळकर (Sanjivraje Naik-Nimbalkar) यांच्या निवासस्थानी भेट दिली. त्यांच्याशी व बाजार समितीचे सभापती रघुनाथराजे नाईक- निंबाळकर यांच्याशी त्यांनी कामरबंद चर्चाही केली. मात्र, ही भेट वैयक्तिक असल्याचे श्री. जानकर यांनी सांगितले.

महादेव जानकर यांनी येथे कार्यकर्ता मेळावा घेऊन स्वतःची उमेदवारी माढा व परभणी लोकसभा मतदारसंघातून जाहीर केली होती. महायुतीशी (Mahayuti) फारकत घेत ते महाघाडीच्या नेत्यांबरोबर वेळोवेळी दिसून आले होते. कुणी काही म्हणूद्यात आपण लोकसभा लढवणारच व जिंकूनही येणार, अशी गर्जना करीत त्यांनी माढ्यातून शड्डू ठोकला होता. नुकतीच त्यांची व शरद पवार यांची बैठक झाली होती; परंतु या बैठकीतून ते तडकाफडकी निघून गेल्याचीही चर्चा होते.

या पार्श्वभूमीवर श्री. जानकर यांनी आज येथे संजीवराजे व रघुनाथराजे यांची भेट घेतली. सुमारे अर्धा तास त्यांनी कमराबंद चर्चाही केली. बाहेर आल्यानंतर औपचारिकपणे बोलताना त्यांनी सांगितले की, श्रीमंत मालोजीराजे हे पहिले मंत्री होते. माझे आजोबा, आई व वडिलांनी त्यांना त्यावेळी मतदान दिले आहे. त्यामुळे मालोजीराजे यांच्यावर संजीवराजे व रघुनाथराजे यांचाच हक्क नसून आमचाही हक्क आहे.

रामराजे यांनी मला मायेचं प्रेम दिले. त्यांचा व माझा पक्ष वेगवेगळा आहे; पण मी धाकटा भाऊ म्हणून याठिकाणी आशीर्वाद मागायला आलो आहे. आजची माझी भेट ही वैयक्तिक व आशीर्वाद मागण्यासाठी आहे. पुढील काळात काय करायचे ते आम्ही करूच, असेही जानकर यांनी यावेळी सांगितले.