चिमठाणे (धुळे) : ‘‘लोकसभेची यंदाची निवडणूक देशात परिवर्तन आणणारी असून, भाजपचे नरेंद्र मोदी आणि अमित शहा यांना मते दिली तर पुढची पिढी गुलामगिरीत असेल,’’ असे विधान करत ‘संविधान वाचले, तरच देश वाचेल’, अशी भूमिका काँग्रेसचे राष्ट्रीय अध्यक्ष मल्लिकार्जुन खर्गे यांनी रविवारी शिंदखेडा येथे मांडली.

लोकसभा निवडणुकीच्या प्रचारार्थ खर्गे यांची सभा झाली. काँग्रेसचे प्रदेशाध्यक्ष नाना पटोले, प्रभारी रमेश चेन्नीथला, काँग्रेस सचिव आशिष दुआ, प्रदेश कार्याध्यक्ष आमदार कुणाल पाटील आदी उपस्थित होते.

पंतप्रधान नरेंद्र मोदी व केंद्रीय गृहमंत्री अमित शहा यांच्यावर टीका करताना खर्गे म्हणाले, ‘‘भाजप व आरएसएस ही निवडणूक लढवत असून राज्यघटना बदलण्यासाठी, याकामी बहुमतासाठी चारशे पारचा नारा ते देत आहेत.

पंतप्रधान मोदी प्रत्येक वर्षी दोन कोटी रोजगार देणार होते. त्याचे काय झाले? काँग्रेसने २५ योजनांचा जाहीरनामा दिला आहे. त्यात महिलांना ८५०० रुपये दरमहा देण्यात येणार आहे.’’ ‘‘मोदी सरकारकडून सरकारी यंत्रणेचा वारेमाप गैरवापर झाला असून कारवाईच्या भीतीने अजित पवार, अशोक चव्हाण, एकनाथ शिंदेंनी लोटांगण घातले.

काँग्रेस देशासाठी लढला, अनेक जण फासावर गेले, राष्ट्रपिता महात्मा गांधी यांच्यासोबत खांद्याला खांदा लावून लढले व देशाला स्वातंत्र मिळवून दिले. भारतीय जनता पक्षाने देशासाठी काय केले,’’ असा प्रश्‍न खर्गे यांनी उपस्थित केला.