हैदराबाद : सॅम पित्रोदा यांच्या वक्तव्यावरून पंतप्रधान नरेंद्र मोदी यांनी आज काँग्रेस पक्ष आणि राहुल गांधी यांच्यावर जोरदार टीका केली. केवळ रंगावरून होणारा अवमान या देशातील नागरिक कधीच सहन करणार नाहीत असे मोदी यांनी म्हटले आहे. द्रौपदी मुर्मू या राष्ट्रपतीपदाच्या निवडणुकीमध्ये पराभूत व्हाव्यात असे काँग्रेसला का वाटत होते? हे आता आपल्याला समजले असल्याचेही त्यांनी नमूद केले. ते वरंगळ येथे आयोजित सभेत बोलत होते.

मोदी म्हणाले, ‘‘ माझ्या देशातील लोकांची क्षमता ही ते कसे दिसतात यावरून ठरेल का? हा त्वचेच्या रंगाचा खेळ खेळण्याची परवानगी शहेजादे यांना कोणी दिली? पित्रोदा यांच्या वक्तव्याची मला चीड आली आहे. एखाद्याने माझा अवमान केला तर मी चिडत नाही. मी तो अपमान सहन करतो.

शहजादा यांच्या मार्गदर्शकांनी केलेल्या या वक्तव्याचा मला राग आला. जे लोक आज राज्यघटना हातात घेऊन व्यासपीठावर नाचत आहेत तेच रंगाच्या आधारावर देशातील नागरिकांचा अवमान करत आहेत. शहजाद्यांचे मार्गदर्शक ज्यांचा रंग काळा आहे ते सगळे आफ्रिकी देशांचे रहिवासी आहेत असे म्हणतात. पित्रोदा यांनी ज्यांचा रंग काळा आहे अशा सर्वांचाच अवमान केला. हा देश भगवान श्रीकृष्णाची पूजा करतो व आपला रंग हा श्रीकृष्णासारखा आहे.’’

त्यांचे तिसरे फ्यूज उडाले

काँग्रेस आणि इंडिया आघाडीचे तिसरे फ्यूजही आता उडाले आहे. आता त्यांची नेतेमंडळी भिंगाचा वापर करून सुरक्षित जागा शोधू लागली आहेत. आता चौथ्या टप्प्यामध्येही त्यांना भिंगांचा वापर करावा लागेल. जनतेच्या आशीर्वादावर भाजप आणि राष्ट्रीय लोकशाही आघाडीची (एनडीए) विजयाच्या दिशेने आगेकूच सुरू आहे असे मोदी यांनी सांगितले.