मुंबईतील शिवाजी पार्क परिसरात लावलेले पंतप्रधान नरेंद्र मोदी आणि अमित शहांचे अनधिकृत कटआऊट्स हटवण्याची वेळ भाजपवर आली. हा प्रकार आचारसंहितेचं उल्लंघन असल्याचं सांगत निवडणूक आयोगानं हे आदेश दिले आहेत. आयोगाच्या आदेशानंतर हे कटआऊट्स हटवण्यात आले आहेत. उद्या शिवाजी पार्कवर महायुतीची सांगता सभा पार पडणार आहे. (PM Modi Amit Shah cutouts removed from Shivaji Park area Mumbai action by ECI)

निवडणूक आयोगानं आदेश दिल्यानंतर मोठ्या पोलीस बंदोबस्तात हे बॅनर हटवण्यात आले आहेत. यावेळी भाजपच्या कार्यकर्त्यांची मोठी गर्दी झाली होती. भाजपच्या कार्यकर्त्यांनी याबाबत नाराजी व्यक्त केली. त्यामुळं त्यांनी इथं चांगलाच राडाही घातल्याचं वृत्त आहे.

शिवसेना भवन ते शिवाजी पार्क या मार्गावर इथं पंतप्रधान नरेंद्र मोदी आणि अमित शहा यांचे मोठे कटआऊट रस्त्यांच्या कडेला फुटपाथवर लावण्यात आले होते.

दरम्यान, उद्याच्या शिवाजी पार्कमधील महायुतीच्या सभेला तिन्ही पक्षांचे नेते उपस्थित राहणार आहेत. काल पंतप्रधान नरेंद्र मोदींच्या रॅलीमध्ये अजित पवार उपस्थित नव्हते पण उद्या होणाऱ्या सभेला मात्र अजित पवार हजेरी लावणार असल्याचं कळतं आहे.