नवी दिल्ली : ‘‘ विकास आणि नुकसान करणाऱ्या पक्षांमधील फरक समजून घेण्याची वेळ मतदारांवर आली आहे,’’ अशा शब्दांत काँग्रेस नेते राहुल गांधी यांनी जनतेला आवाहन केले. ‘एक्स’ वर व्यक्त होताना राहुल गांधी म्हणाले,

‘‘काँग्रेस व भाजपमध्ये फरक आहे. काँग्रेस आणि ‘इंडिया’ आघाडी म्हणजे युवकांना कायमस्वरूपी नोकरी, शेतकऱ्यांना एमएसपीची हमी, प्रत्येक गरीब महिला लखपती, कामगारांना किमान ४०० रुपये प्रतिदिन वेतन, जातिनिहाय जनगणना व आर्थिक सर्वेक्षण आणि राज्यघटना व लोकांच्या अधिकाराचे संरक्षण तर,

भाजप म्हणजे हमखास बेरोजगारी, शेतकऱ्यांवर कर्जाचे ओझे, असुरक्षित व अधिकारापासून वंचित महिला, वंचितांसोबत भेदभाव व त्यांचे शोषण, दाखविण्यासाठी लोकशाही पण खऱ्या अर्थाने हुकूमशाही.’’ ‘‘आपले भविष्य आपल्याच हातात असून विचार करा, जाणून घ्या आणि योग्य निर्णय घ्या,’’ असे आवाहनही राहुल गांधी यांनी ‘एक्स’वरील पोस्टमध्ये केले आहे.