लखनौ : उत्तर प्रदेशात बहुजन समाज पक्षाच्या (बसप) सर्वेसर्वा मायावती यांनी त्यांचे राजकीय वारसदार आणि भाचे आकाश आनंद यांची पक्षाच्या राष्ट्रीय समन्वयकपदावरून उचलबांगडी केल्याने खळबळ निर्माण झाली आहे. मायावतींच्या या निर्णयावरून तर्कवितर्क लढविले जात आहेत.

पक्षामध्ये कारवाई केली जात असताना सामान्य कार्यकर्ते आणि आपले नातेवाईक यांना वेगळा न्याय नसल्याचा संदेश मायावतींनी दिला आहे. मायावतींनी आकाश आनंद यांना राजकीय वारसदार म्हणून घोषित केल्यानंतर ‘बसप’वर घराणेशाहीचा आरोप होऊ लागला होता.

भाजपने हाच मुद्दा प्रचारामध्ये लावून धरला होता. दुसरीकडे आकाश यांनीही भाजपवर जाहीर सभांतून तोंडसुख घ्यायला सुरूवात केली होती. आधीच भाजपबाबत मवाळ भूमिका घेणाऱ्या बहनजींना भाच्याची आक्रमक भूमिका रुचली नाही.

सीतापूर येथील सभेतील भाषणानंतर आकाश यांच्यावर आचारसंहिता भंगाचा गुन्हा दाखल झाला होता. सध्या भाजपसोबत गेलेल्या बिगर जाटव दलित मतदारांमध्येही अस्वस्थता निर्माण झाली होती. ही नाराजी मायावतींच्या कानी घालण्यात आल्यानंतर त्यांनी थेट आकाश आनंद यांच्यावरच कारवाई केली. मायावतींनी आकाश आनंद यांच्या राज्यातील सर्वच सभाच रद्द केल्या आहेत.