सांगली : महाविकास आघाडीत काँग्रेसची कोंडी झाल्यानंतर बंडाचा पवित्रा घेणारे काँग्रेस नेते विशाल पाटील लोकसभेला भिडणार की विधानपरिषद किंवा राज्यसभा सदस्यत्वाची ऑफर स्वीकारून बंड थंड करणार, याचा फैसला उद्या (ता. २२) होणार आहे.

सांगली लोकसभा मतदारसंघातील अर्ज माघारीची अंतिम मुदत उद्या (ता. २२) दुपारी तीन वाजता संपत आहे. त्याआधी आमदार विश्‍वजित कदम व विशाल यांच्यावर काँग्रेसकडून प्रचंड दबाव टाकला जात आहे. सोबतच त्यांना विधान परिषद किंवा राज्यसभेवर पाठवण्याचा शब्द दिला आहे.

महायुतीत भाजपचे संजय पाटील, महाविकास आघाडीत उद्धव ठाकरे यांच्या शिवसेनेकडून चंद्रहार पाटील यांची उमेदवारी निश्‍चित आहे. मात्र, भाजप विरुद्ध काँग्रेस बंडखोर अशी लढत होण्याची शक्यता निर्माण झाली आहे. महाविकास आघाडीकडून आमदार विश्‍वजित कदम यांच्या माध्यमातून विशाल पाटील यांच्याशी संपर्क साधला जात आहे. पाटील यांची कोंडी केली जात असल्याच्या भावनेतून आज जिल्हाभरातील कार्यकर्त्यानी विशाल यांची भेट घेतली. कोणत्याही स्थितीत मागे फिरू नका, असे आवाहन केले. विशाल पाटील यांनी लढण्यावर ठाम असल्याचे सांगत त्यांना आश्‍वस्त केले.

प्रतीक पाटील कार्यकर्त्यांमागे

स्वाभिमानी शेतकरी संघटनेचे महेश खराडे यांचा निर्णय काय असेल, याकडे विशेष लक्ष असेल. याशिवाय, एकूण २५ उमेदवार रिंगणात आहेत. विशेष म्हणजे विशाल पाटील यांनी माघार घेतली तरी काँग्रेस कार्यकर्त्यांना वाऱ्यावर सोडणार नाही, अशी भूमिका घेत माजी केंद्रीय राज्यमंत्री प्रतीक पाटील यांनी अर्ज भरला आहे.