नवी दिल्ली: लोकसभा निवडणुकीच्या चौथ्या टप्प्यात राज्यातील ११ मतदारसंघांसह दहा राज्ये आणि केंद्रशासित प्रदेशातील ९६ मतदारसंघांत आज संध्याकाळी सहा वाजेपर्यंत ६४.४३ टक्के मतदान झाले. राज्यात ढगाळ वातावरण असल्याने दुपारीही मतदान केंद्रांवर रांगा दिसत होत्या. इतर राज्यांच्या महाराष्ट्रात तुलनेने कमी मतदान झाले. संध्याकाळी पाचपर्यंतची मतदानाची टक्केवारी निराशाजनक असली तरी, त्यानंतर मतदारांनी मोठ्याप्रमाणावर मतदान केल्याने अनेक मतदारसंघांत मागील निवडणुकीच्या तुलनेत अधिक मतदान झाले.

पुणे, मावळ, शिरूर, नगर, शिर्डी, बीड, नंदूरबार, जळगाव, रावेर, जालना व औरंगाबाद या ११ मतदारसंघांमध्ये मतदान झाले. राज्यात सर्वाधिक मतदान नंदुरबार, जालना आणि बीड जिल्ह्यांत झाले. संध्याकाळनंतर मतदारांनी गर्दी केल्याने मतदानाची वेळ उलटून गेल्यावरही या जिल्ह्यांमध्ये मतदान केंद्रांवर रांगा दिसत होत्या.

त्यामुळे मागील तीन टप्प्यांप्रमाणे यावेळीही मतदानाच्या अंतिम टक्केवारीत वाढ झाल्याचे दिसून येण्याची शक्यता वर्तविण्यात आली. देशातील ९६ मतदारसंघातील १,७१७ उमेदवारांचे भवितव्य इलेक्ट्रॉनिक मतदान यंत्रांमध्ये बंद झाले. आंध्र प्रदेशातील २५, तेलंगणमधील १७, उत्तर प्रदेशातील १३, प. बंगाल आणि मध्य प्रदेशातील प्रत्येकी आठ, बिहारमधील पाच, ओडिशा आणि झारखंडमधील प्रत्येकी चार तर जम्मू काश्मीरमधील एका जागेसाठी मतदान झाले. या टप्प्यातील मतदानानंतर ३७९ मतदारसंघातील मतदान पार पडले आहे. आंध्रमध्ये १७५ विधानसभेच्या जागांसाठीही आज मतदान पार पडले आहे.

काही ठिकाणी हिंसक घटना

• आंध्र प्रदेश : अनेक ठिकाणी हिंसक घटना

• आंध्र प्रदेश : गुंटूरचे आमदार व्ही. शिवकुमार यांची एका मतदारासोबत हाणामारी

• उत्तर प्रदेश : काही गावांतील लोकांचा मतदानावर बहिष्कार

• प. बंगाल, ओडिशा : ‘ईव्हीएम’मध्ये बिघाड झाल्याच्या तक्रारी

• प. बंगाल : गैरप्रकार झाल्याच्या भाजप आणि तृणमूलकडून तक्रारी