कोल्हापूर : लोकसभा निवडणुकीसाठी (Kolhapur Loksabha Elections) भाजपच्या वाट्याला आलेल्या जागांचे वाटप झाले आहे. मुख्यमंत्री एकनाथ शिंदे यांची शिवसेना व राष्ट्रवादी अजित पवार गट यांच्यातील जागा वाटपाचा प्रश्‍न सोडवण्यासाठी मुंबईत बैठक होत असून, त्यात हा तिढा सुटेल, अशी माहिती जिल्ह्याचे पालकमंत्री हसन मुश्रीफ (Hasan Mushrif) यांनी दिली.

जिल्हा बँकेते ते पत्रकारांशी बोलत होते. कोल्हापुरात काँग्रेसकडून श्रीमंत शाहू महाराज (Shahu Maharaj) यांचे नाव जाहीर झाल्याने महायुतीचा उमेदवार जाहीर झालेला नाही का, या प्रश्‍नावर मुश्रीफ म्हणाले, ‘महायुतीतील भाजप उमेदवारांची नांवे जाहीर झाली आहेत. शिवसेना व अजित पवार गटाची भाजप नेत्यांची बैठक आज दिल्लीत होत आहे, त्यात हा तोडगा निघेल.’

ज्या जागा अडचणीत आहेत, त्या जाहीर झालेल्या नाहीत, असे सांगितले जाते याविषयी ते म्हणाले, ‘याबाबत मला काही माहिती नाही, ‘आप की बार ४०० पार’ एवढेच मला माहीत आहे. कुठलीही जागा धोक्यात नाही.’ मनसे प्रमुख राज ठाकरे महायुतीत येत आहेत, त्याची घोषणा उपमुख्यमंत्री देवेंद्र फडणवीस करतील, असे त्यांनी एका प्रश्‍नाला उत्तर देताना सांगितले.

लोकसभा असो किंवा विधानसभा ज्यांना या निवडणुका लढवायच्या आहेत, पण त्यांना तिकीट मिळत नाही, असे लोक उड्या मारत असतात. सगळ्याच पक्षांत असे होत असते. त्यामुळे तिकडे फारसे लक्ष देण्याची गरज नसल्याचे मुश्रीफ यांनी एका प्रश्‍नाला उत्तर देताना सांगितले.