रत्नागिरी : पालकमंत्री उदय सामंत (Uday Samant) यांचे मोठे बंधू किरण सामंत यांनी आपल्या कार्यालयावरील उदय सामंत यांचे फोटो हटवल्यामुळे तर्कवितर्कांना उधाण आले होते. किरण सामंत (Kiran Samant) यांनी फोटो हटवले म्हणजे धुसफूस नव्हे, असे सांगून राणेंचा प्रचारासाठी लांजा येथे दौरा करून कार्यकर्त्यांना प्रोत्साहन देणार असल्याचे स्पष्ट केले.

रत्नागिरी-सिंधुदुर्ग लोकसभा (Ratnagiri-Sindhudurg Lok Sabha) मतदारसंघाची किरण सामंत यांना उमेदवारी मिळावी, अशी मागणी मंत्री सामंत यांच्याकडून केली जात होती. पण केंद्रीय मंत्री नारायण राणे (Narayan Rane) यांना उमेदवारी जाहीर झाली. काल (ता. १) अचानक किरण सामंत यांच्या रत्नागिरीतील दोन कार्यालयावरील पालकमंत्री उदय सामंत यांचे फोटो काढून टाकण्यात आले.

शिवसेना जिल्हासंपर्क कार्यालयावरील बॅनर हटवला असून तिथे किरण सामंत संपर्क कार्यालय असा बॅनर लावण्यात आला आहे. त्यामुळे काल दिवसभर मंत्री उदय सामंत आणि किरण सामंत यांच्यामध्ये फूट पडल्याची चर्चा रंगली. पालकमंत्री सामंत यांनी पत्रकारांच्या प्रश्नाना उत्तर देताना जर किरण सामंत नाराज असतील त्यांची नाराजी दूर करू असे सांगितले. किरण सामंत यांनीही भावांमध्ये धुसफूस नसल्याचे स्पष्ट केले. हा गोंधळ आज विरला असून त्यावर पडदा पडला आहे.