Vardha Lok Sabha 2024 : वर्धा मतदारसंघात गेल्या दोन लोकसभा निवडणुकीत भाजप निवडून आला आहे. कधी काळी काँग्रेसचा गड असलेल्या या जिल्ह्यात काँग्रेस आज नावाला उरली आहे. या निवडणुकीत भाजपने पुन्हा खासदार रामदास तडस यांनाच सलग तिसऱ्यांदा रिंगणात उतरविले आहे. एकेकाळी हा मतदारसंघ १९८९ पर्यंत कॉँग्रेसचा बालेकिल्ला होता. त्यानंतर मात्र एकदा माकप व त्यानंतर कधी भाजप तर कधी कॉँग्रेस असा सत्ताबदल होत गेला. आता गेल्या दोन निवडणुकीपासून भाजपने आपले वर्चस्व निर्माण केले आहे. महाविकास आघाडी इथे नव्या उमेदवाराच्या शोधात आहे.

२०१९ चे चित्र

रामदास तडस (भाजप) विजयी मते : ५,७८,३६४

चारूलता टोकस (काँग्रेस) मते : ३,९१,१७१

धनराज वंजारी (वंचित बहुजन आघाडी) मते : ३६,४५२

शैलेश अग्रवाल (बसप) मते : ३६,४२३

विजयी उमेदवारांचे मताधिक्य : १,८७,१९३

वर्चस्व

२००४ : भाजप

२००९ : काँग्रेस

२०१४ : भाजप

२०१९ : भाजप

सद्य:स्थिती

• वर्धा मतदारसंघात नेहमीच तेलीविरुद्ध कुणबी असे समीकरण राहिले आहे.

• या मतदारसंघात माळी समाजाचीही संख्या लक्षणीय आहे.

• मुस्लीम आणि दलित मतदान हे काँग्रेसकडे वळत असल्याचा इतिहास आहे.

• बसपचा केडर या मतदारसंघात असून तो कोणाकडे वळतो, यावर लक्ष ठेवावे लागेल.

• नवीन मतदारांचा कौल निवडणुकीत महत्त्वाचा ठरेल.

हे मुद्दे प्रभावी ठरणार

• मतदारसंघात रोजगाराचा अभाव

• शेती प्रक्रिया नसलेले उद्योग

• एकही मोठा उद्योग नाही

• जिल्ह्यात झालेला रस्ते विकास

• सेवाग्राम विकास आराखडा

• वर्धा, सिंदी, पुलगाव, धामणगाव येथील रखडलेले रेेल्वे उड्डाणपुल