पणजी : मनोहर पर्रीकर यांच्या निधनामुळे रिक्त झालेल्या जागेवर    कॉंग्रेसचे उमेदवार आतानासिओ ( बाबुश) मोन्सेरात यांनी विजयाला गवसणी घातली आहे. अधिकृत निकाल जाहीर झाला नसला तरी मतमोजणी पूर्ण झाल्यानंतर मोन्सेरात यांनी सोळाशेहून अधिक मताधिक्क्य मिळवले आहे.

पर्रीकर यांचे १७ मार्चला निधन झाले होते. त्यामुळे पणजी विधानसभा मतदारसंघात पोटनिवडणूक १९ मे रोजी पार पडली होती. पर्रीकर यांनी २५ वर्ष पणजी मतदारसंघ ताब्यात ठेवला होता. मुख्यमंत्रीपद त्यागून २०१५ मध्ये केंदात संरक्षणमंत्री बनल्यानंतर झालेल्या पोटनिवडणुकीतही भाजपचे सिध्दार्थ कुंकळ कर हे निवडून आले होते. त्यावेळी मोन्सेरात हे युनायटेड गोवन्स डेमोक्रेटिक पक्षाच्या उमेदवारीवर लढले होते आणि कुंकळकर यांनी त्यांचा ११०५ मतांनी पराभव केला होता.

मनोहर पर्रीकरांच्या पश्चात भाजपला आपला गड राखता आला नाही. पर्रीकर यांचे ज्येष्ठ पुत्र उत्पल यांना भाजपने उमेदवारी द्यावी, अशी मागणी कार्यकर्त्यांनी केली होती. परंतु पक्षाने उत्पल यांना उमेदवारी डावलून कुंकळकर यांना दिली होती. पर्रीकरांची जागा राखता आली नसल्याने भाजपला मोठा फटका बसला आहे. सरकारच्या स्थैर्यावरही त्याचा परिणाम होऊ शकतो अशी राजकीय स्थिती निर्माण झाली आहे.