नागपूर - राज्य मार्ग परिवहन महामंडळाला (एसटी) मालवाहतुकीत गेल्या तीन वर्षांत १२७ कोटी ५१ लाख रुपयांचे उत्पन्न मिळाले. आयुष्य संपलेल्या १ हजार १२४ बसेसचे मालवाहू वाहनांत रूपांतर केल्याने महामंडळाला नवीन उत्पन्नाचा स्त्रोत निर्माण करण्यास यश आले आहे.

२० मे २०२० पासून महामंडळाने मालवाहतुकीला सुरवात केली. मे २०२० ते मार्च २०२१ या कालावधीत मालवाहतुकीच्या ८१ हजार ६८४ फेऱ्या झाल्या. एकूण १ कोटी १८ लाख ५९ हजार ४०७ किलोमीटर वाहने धावली. त्यातून महामंडळाला ४७ कोटी ३८ लाख रुपये मिळाले.

तसेच एप्रिल २०२१ ते मार्च २०२२ दरम्यान ६७ हजार ९४८ फेऱ्या झाल्या. एकूण ९० लाख ७२ हजार १८५ किलोमीटर गाडी धावली. त्यातून महामंडळाला ४३ कोटी ९५ लाख रुपये मिळाले. एप्रिल २०२२ ते मार्च २०२३ दरम्यान मालवाहतुकीच्या ३८ हजार ९४८ फेऱ्या झाल्या. एकूण गाडी ५२ लाख ७८ हजार १३६ किलोमीटर गाडी धावली. त्यातून महामंडळाला ३१ कोटी १६ लाख रुपये मिळाले.

तसेच एप्रिल २०२३ ते मे २०२३ दरम्यान ५ हजार ६३९ फेऱ्या झाल्या. एकूण ७ लाख ५० हजार ८६७ किलोमीटर गाडी धावली. त्यातून ५ कोटी १ लाख रुपयांचे उत्पन्न मिळाले. एकंदरीतच या तिन्ही वर्षाच्या कालावधीत एकूण १ लाख ९४ हजार २१९ फेऱ्या झाल्या. एकूण २ कोटी ६९ लाख ६० हजार ५९५ किलोमीटर गाडी धावली.

त्यातून महामंडळाला १२७ कोटी ५१ लाख रुपयांचे उत्पन्न मिळाले आहे. या दरम्यान मालवाहतुकीचा दर हा २०० किलोमीटर पर्यंत ५७ रुपये प्रति किलोमीटर होता. त्यापुढे ५५ रुपये प्रति किलोमीटर आहे. तर कमीत कमी ४ हजार ५०० रुपये भाडे एकेरी वाहतुकीसाठी आहे. याबाबतची माहिती अभय कोलारकर यांनी माहिती अधिकारात मागितली होती. त्यास महामंडळाने सदर माहिती उत्तरात दिली.

बालभारतीच्या बुकिंगने एसटी मालामाल

मे २०२० ते मे २०२३ या तीन वर्षांच्या कालावधीत महामंडळाने बालभारतीची मालवाहतूक केली. याकरिता १ हजार ५६६ फेऱ्या झाल्या. एकूण २ लाख ६७ हजार ६३७ किलोमीटर वाहतूक करण्यात आली. त्यातून महामंडळाला २ कोटी १ लाख २५ हजार ८६ रुपयांचे उत्पन्न मिळाले. प्रति फेरी ही ९ ते १० टनाची आहे.

मुंबई, पुणे, छत्रपती संभाजीनगर, नागपूर आणि लातूर या विभागात बालभारतीसोबत केलेल्या करारानुसार ही वाहतूक करण्यात आली असल्याची माहिती आरटीआय अंतर्गत देण्यात आली.