अकोला: दहावीचा निकाल लागल्यानंतर जिल्ह्यातील महाविद्यालयांमध्ये इयत्ता ११वी करीता प्रवेशासाठीची प्रक्रिया सुरु झाली आहे. यावेळी संपूर्ण प्रवेश प्रक्रिया कनिष्ठ व उच्च महाविद्यालय स्तरावर होणार आहे. याबाबतचे वेळापत्रक शिक्षणाधिकारी माध्यमिक डॉ. सुचिता पाटेकर यांनी जाहीर केले आहे. सर्व प्रवेश शासन आरक्षणानुसार व गुणवत्तेनुसार होणार आहेत.

दहावीचा निकाल लागल्यानंतर आता विद्यार्थी व पालकांची ११वी प्रवेशासाठी लगबग दिसून येत आहे. त्यामुळे माध्यमिक शिक्षण विभागाने ११वी प्रवेशाचे वेळापत्र व सूचना जारी केल्या आहेत.

त्यानुसार शाखानिहाय प्रवेश देताना विद्यार्थ्यांना प्रवेश आवेदन पत्रांचे वाटप करण्यात यावे, शाखा निहाय प्रवेश देताना निर्धारित प्रवेश क्षमतेच्या अधीन राहून प्रवेश देण्यात यावे, इनटेक कॅपिसिटीपेक्षा जादा विद्यार्थ्यांना प्रवेश दिल्यास, अतिरिक्त विद्यार्थी झाल्यास पटपडताळणीमध्ये सदरचे प्रवेश किंवा जादा प्रवेश रद्द करण्यात येतील.

इयत्ता११वी प्रवेश प्रक्रिया दिलेल्या वेळापत्रकानुसार करण्यात यावी, प्रवेश देताना नियमानुसार आरक्षणाचे तंतोतंप पालन करावे, सीबीएसई व आयसीएसई बोर्डाची परीक्षा पास करणाऱ्या विद्यार्थ्यांसाठी एकूण प्रवेश क्षमतेच्या १० ते १५ टक्के जागा रिक्त ठेऊन ११वी प्रवेश प्रक्रिया रूबविण्यात यावी, या व इतर सूचना शिक्षणाधिकारी माध्यमिक यांनी विद्यालय, महाविद्यालयांना दिल्या आहेत.

असे आहे वेळापत्रक

१२ ते १६ जून : विद्यार्थ्यांना प्रवेश अर्ज वितरीत करणे व अर्ज स्वीकारणे.

१७ जून : अर्जांची छाननी करणे.

१९ जून : प्रवेशास पात्र विद्यार्थ्यांची एकत्रित गुणवत्ता यादी व प्रवेश क्षमतेनुसार प्रत्यक्ष गुणवत्तेनुसार विहित आरक्षणाप्रमाणे संवर्गनिहाय स्वतंत्र यादी तयार करणे व सूचना फलकावर लावणे.

२० ते २२ जून : प्रवेश यादीनुसार विद्यार्थ्यांना प्रवेश देणे.

२३ जून : रिक्त जागेसाठी १ली प्रतीक्षा यादी लावणे.

२४ ते २६ जून : प्रतीक्षा यादीतील विद्यार्थ्यांना प्रवेश देणे.

२७ जून : दुसरी प्रतीक्षा यादी सूचना फलकावर लावणे व प्रवेश देणे.

२९ जून : दुसऱ्या प्रतीक्षा यादीचे प्रवेश करणे.