धुळे : सायमाची हुशारी, चुणूक पाहून तिच्या उच्च शिक्षणाविषयी स्वप्नपूर्तीचा विश्‍वास जरी असला तरी त्यात आर्थिक स्थितीचा मोठा अडथळा होता. मात्र, माणुसकीचा झरा अजूनही आटलेला नाही याचा प्रत्यय सायमासह शेख परिवाराला आला. तिच्या परदेशातील उच्च शिक्षणासाठी असंख्य दानशूरांचे मदतीचे हात पुढे आले, त्यांनी नऊ लाखांचा निधी संकलित केला आणि त्या बळावर सायमाने स्वप्नपूर्तीसाठी जर्मनीला प्रयाण केले. 

धुळे शहरासह राज्यात पुरोगामी चळवळीतील सर्वांना ओळखीचे नाव ते म्हणजे नूरा शेख. त्यांना दोन मुली आणि मुलगा आहे. सायमा ही थोरली लेक. तिचे प्राथमिक शिक्षण येथील एल. एम. सरदार उर्दू हायस्कूलमध्ये झाले. ती दहावीत उर्दू माध्यमात जिल्ह्यात पहिली आली. तिची शिक्षणातील प्रगती पाहून आर्थिक बिकट स्थितीशी मुकाबला करत, मुस्लिम समाजातील पारंपरिक विचारांना फाटा देत नूरा शेख यांनी पुणेस्थित आझम कॅम्पसमध्ये सायमाचा प्रवेश घेतला. तेथे तिने बारावीत चांगले गुण मिळविले. याच महाविद्यालयात भौतिकशास्त्र विषयात तिने पदवी घेतली.

पुढील शिक्षण परदेशात घेण्याचा मनोदय सायमाने वडिलांकडे बोलून दाखविला. तिचे स्वप्न पूर्ण करण्यासाठी नूरा शेख यांनी तयारी सुरू केली. त्यासाठी पुण्यातील फर्ग्युसन महाविद्यालयाचे निवृत्त प्राचार्य वसंत शिंदे यांनी मार्गदर्शन केले. जर्मनीतील बॉन विद्यापीठात "फिजिक्‍स ऍस्ट्रोनामी'च्या प्रवेशासाठी प्रबंध सादर केला. तो विद्यापीठाने मंजूर केला. त्यामुळे सायमाचा जर्मनीतील विद्यापीठाचा प्रवेश निश्‍चित झाला. 

नऊ लाखांचा निधी संकलित 

सायमाचे स्वप्न पूर्ण करण्याची जबाबदारी पालकांपुढे होती. तिला दोन वर्षांसाठी नऊ लाखांचा खर्च येणार होता. गरिबीमुळे तो पेलवणारा नव्हता. मात्र, बाप-लेकीने हिंमत सोडली नाही. त्यांच्या पाठीशी अनेक दानशूर उभे राहिले. काही दिवसात नऊ लाखांचा निधी संकलित झाला. त्यातून सायमाने विद्यापीठाचे प्रवेश शुल्क भरले. या बळावर आणि दानशूरांचे आभार मानत सायमा जर्मनीकडे रवाना झाली आहे.