मुंबईः भाजपच्या टीकेला उत्तर देतांना आदित्य ठाकरे यांनी थेट चॅलेंज दिलं आहे. भाजप नेते सुधीर मुनगंटीवार यांच्या टीकेला त्यांनी सडेतोड उत्तर दिलं.

'वरळीमध्ये निवडणुका होऊ द्या, मग कळेल कोणाचा पोपट मेला आहे' असं विधान सुधीर मुनगंटीवार यांनी केलं होतं. त्यावर बोलतांना आदित्य ठाकरे यांनी थेट मुख्यमंत्री एकनाथ शिंदे यांना टार्गेट केलंय.

आदित्य ठाकरे म्हणाले की, घटनाबाह्य मुख्यमंत्र्यांना आधी माझ्यासमोर निवडणुकीसाठी उभं करा, मी आज राजीनामा देतो. असं ओपन चॅलेंज त्यांनी दिलं आहे.

ठाकरे पुढे म्हणाले की, महाविकास आघाडी सरकारच्या काळात राज्यात कुठेही दंगली घडल्या नव्हत्या. परंतु शिंदे सरकारच्या काळात अनेक ठिकाणी दंगली घडत आहेत. आगामी निवडणुकीच्या अनुषंगाने दंगली घडवल्या जात आहेत का? असा सवाल आदित्य ठाकरे यांनी उपस्थित केला आहे.

दरम्यान, आदित्य ठाकरे यांनी मुख्यमंत्री एकनाथ शिंदे यांना थेट वरळीतून उभं राहण्याचं चॅलेंज दिल्याने आश्चर्य व्यक्त होत आहे. सुधीर मुनगंटीवार यांच्या टीकेला त्यांनी जशास तसं प्रत्युत्तर दिलं. यावर मुख्यमंत्री एकनाथ शिंदे काय बोलणार? याकडे राज्याचं लक्ष लागून राहिलं आहे.