तिसंगी : पत्नीचा खून करुन आरोपी खुनाची शिक्षा भोगत होता. मागे कोरोना काळात त्याने रुग्णालयातून पलायन केलं अन् विषांतर करुन फिरु लागला. तो जेव्हा गावात आला तेव्हा ग्रामस्थांना मोठ्या शिताफीने त्याला पकडून पोलिसांच्या ताब्यात दिलं.

तिसंगी (ता. पंढरपूर) येथील शिवाजी नाथाजी भोसले हा पत्नीच्या खुनाच्या अरोपाखाली शिक्षा भोगत होता. कोरोना काळात २०२०मध्ये आजारी असताना त्याला उपजिल्हा रुग्णालय दाखल करण्यात आले होते. त्यावेळी त्याने शौचाला जाण्याचा बहाणा केला अन् शौचालयाची खिडकी तोडून पळून गेला.

त्यानंतर शिवाजी नाथाजी भोसले हा दोन वर्षांपासून वेषांतर करुन फिरत होता. दि. 18 आक्टोंबर, बुधवारी सायंकाळी 7 वाजता त्याने बुवाचा वेष धारण करुन तिसंगी गावात प्रवेश केला. गावात संशयितरित्या फिरत असताना गावातील लोकांना तो दिसला.

तो खुनाच्या गुन्ह्यातला आरोपी असल्याचा लोकांना संशय आला. त्यानंतर तिसंगी गावातील लोकांनी त्याला पोलिसांच्या ताब्यात दिलं. दोन वर्षांपूर्वी पोलिसांना चकवा देवून पळालेला आरोपी शिवाजी नाथाजी भोसले, हा तोच असल्याचं नंतर सिद्ध झालं.

या प्रकरणामध्ये आरोपी फरार झाल्यामुळे पोलिसांचं निलंबनदेखील झालं होतं. तिसंगी गावाने केलेल्या कामगिरीबद्दल पंढरपूर पोलिस स्टेशनचे अधिकारी पीएसआय प्रशांत भागवत यांनी गावकऱ्यांचे अभिनंदन केले. आरोपीस आज सेशन कोर्ट व प्रथम वर्ग न्यायालय हजर करण्यात आले. पुढील तपास पीएसआय भागवत हे करीत आहेत.