राष्ट्रवादीचे नेते अमोल मिटकरी यांनी केलेल्या एका विधानावरुन ब्राह्मण महासंघानं पुण्यात राष्ट्रवादीच्या कार्यालयाबाहेर आंदोलन केलं आहे. यावेळी महासंघाचे नेते आनंद दवे हे आक्रमक झाले. त्यांनी राष्ट्रवादी काँग्रेसला इशारा देताना आज आम्ही कार्यालयात घुसलो आहोत, उद्या घराघरात घुसू असा इशाराही दिला आहे. आमदार मिटकरी यांच्या या वक्तव्यावरून सध्या टीकेचे धनी झाले आहे. दरम्यान, आता आचार्य तुषार भोसले यांनी तीन मंत्र्यांवरी टीकास्त्र सोडले आहे.

यासंदर्भात आचार्य भोसले यांनी एक ट्विट केलं आहे. त्यांनी मंत्री जयंत पाटील, मंत्री धनंजय मुंडे आणि अमोल मिटकरी यांच्यावर अप्रत्यक्षरित्या टीका केली आहे. यात ते म्हणतात, नुकताच एक व्हिडिओ व्हायरल झाला आहे. त्यामध्ये पवित्र हिंदू धर्माच्या परंपरेची आणि संस्कृतीची खिल्ली उडवण्यात आली आहे. हिंदू धर्माची चेष्टा करणारा हा दुसरा तिसरा कोणी नसून राज्याच्या राजकारणातील शकुनी मामाचा सरदार अमोल किटकरी आहे. आणि त्यावर निर्लज्जपणे दात काढणारे मंत्री जयंत पाटील आणि तीन-चार बायका सोडणारे मंत्री धनंजय मुंडे आहेत. पावसाळी सुरु होण्याआधी या बांडगुळांनी तोंड वर काढंल आहे. परंतु हिंदू समाज यांना आणि शकुनी मामाच्या फौजेला योग्य उत्तर दिल्याशिवाय राहणार नाही, असा त्यांनी इशारा दिला आहे.

दरम्यान, या आंदोलनाविरोधात स्पष्टीकरण देताना अमोल मिटकरी म्हणाले, माझं भाषण जर पूर्ण ऐकलं असेल तर त्यामध्ये कुठल्याही समाजाचा उल्लेख केलेला नाही. मी कोणाबद्दलही अपशब्द बोललेलो नाही. मी तिथं एका गावातील कन्यादानाच्या प्रसंगाचं उदाहरण देऊन मंत्रोच्चाराचा उल्लेख केला. यामध्ये कोणालाही त्रास होण्याचं कारण नाही. त्यामुळं भाषणाचा विपर्यास करुन वेगळ्या पद्धतीनं वळण देण्याचं कटकारस्थानं केलं जात आहे.