मुंबई : हिंदुत्वाच्या मुद्यावरून शिवसेनेला ‘बॅकफूट’वर टाकण्याची व्यूहरचना आखलेल्या भाजप, मनसेवर कुरघोडी करत राज्याचे पर्यटनमंत्री आदित्य ठाकरे हे पुढील महिन्यात अयोध्याला जाणार आहेत.

आदित्य यांच्या दौऱ्याची आतापासून मोर्चेबांधणी करण्यात येत आहे. त्यासाठी खासदार संजय राऊत यांची टीम काम करणार असल्याचे सांगण्यात येते. महाराष्ट्र नवनिर्माण सेनेचे अध्यक्ष राज ठाकरे यांनीही नुकतेच अयोध्याला जाणार असल्याची घोषणा केली होता. मात्र, त्यांचा दौरा अद्याप निश्चित झालेला नाही. त्याआधीच आदित्य यांच्या अयोध्या दौऱ्याची घोषणा होऊ शकते. दरम्यान मे महिन्याच्या पहिल्या आठवड्यात आदित्य यांचा अयोध्या दौरा पार पडू शकतो अशी माहिती सूत्रांनी दिली.

राज्यात हिंदुत्वाच्या मुद्यावरून एकत्र येत भाजप आणि मनसेकडून शिवसेनेची कोंडी करण्याची खेळी खेळली जात आहे. त्यावरून आरोप-प्रत्यारोपही होताना दिसतात . आगामी काळात मनसे हिंदुत्वावर भर देत, निवडणुकीच्या आखाड्यात उतरण्याची शक्यता वर्तविण्यात येत आहे. त्यातूनच भाजप आणि मनसेचे मनोमिलन होण्याचा अंदाजही बांधला जात आहे. प्रार्थना स्थळांवरील भोंग्याच्या मुद्यावरून राजकारण ढवळून निघाले असताना या सगळ्या राड्यामध्ये शिवसेनेनेही हिंदुत्ववादी बाणा जपण्याचा निर्णय घेतला आहे. आदित्य यांनी आपल्या अयोध्या दौऱ्याची माहिती माध्यमांना दिली. हा दौरा यशस्वी करण्याची जबाबदारी नाशिकमधील शिवसेनेच्या कार्यकर्त्यांवर सोपविण्यात आल्याचे समजते.