शिवसेनेच्या ठाकरे गटाचे प्रमुख उद्धव ठाकरे आणि वंचित बहुजन आघाडीचे प्रमुख प्रकाश आंबेडकर यांच्यामध्ये आज दुपारी बैठक पार पडणार आहे. पालिका निवडणुकांच्या पार्श्वभूमीवर ही बैठक पार पडत आहे. तर आगामी काळात वंचित बहुजन आघाडी आणि ठाकरे गट एकत्र येण्याची शक्यता राजकीय वर्तुळात रंगली आहे.

तर आगामी निवडणुकीसाठी उद्धव ठाकरे यांचा शिवसेनेचा ठाकरे गट आणि प्रकाश आंबेडकर यांची वंचित बहुजन आघाडी एकत्र येणार असल्याची घोषणा काही दिवसांपूर्वी वंचितकडून करण्यात आली आहे. तर आज वंचित बहुजन आघाडी आणि ठाकरे गट यांची पहिलीच बैठक पार पडणार आहे. महापालिका निवडणुकीच्या पार्श्वभूमीवर आपली रणनीती ठरवण्यासाठी ठाकरे आणि आंबेडकर यांच्यात आज दुपारी मुंबईत बैठकीत चर्चा होणार आहे.

त्याचबरोबर प्रकाश आंबेडकर यांनी उद्धव ठाकरे यांच्यासोबत युती करण्याआधी महाविकास आघाडीमधील वंचित बाबत भूमिका आणि काही अटी शर्ती सांगितल्या होत्या. त्यासंदर्भात ठाकरे गट काय निर्णय घेणार हे या बैठकीत ठरण्याची शक्यता आहे. आंबेडकर आणि ठाकरे यांची युती होत असतानाच दुसरीकडे शिंदे गटही प्रकाश आंबेडकर यांना आपल्यासोबत आणण्याचे प्रयत्न करत आहे.

त्याचबरोबर आज हिवाळी अधिवेशनात मांडायच्या महत्वाच्या मुद्द्यांबाबत आज महाविकास आघाडीची बैठक होणार आहे. विरोधी पक्षनेते अजित पवार यांच्या देवगिरी निवासस्थानी बैठकीचे आयोजन करण्यात आलं आहे. 19 तारखेला होणाऱ्या राष्ट्रवादीच्या शेतकरी मोर्चाबाबत देखील या बैठकीमध्ये चर्चा होणार आहे. तर या बैठकीला आंबेडकर उपस्थित राहण्याची शक्यता आहे.