गुढीपाडवा मेळाव्यात राज ठाकरे यांनी भाषणात अनेक मुद्दे उपस्थित करत महाविकास आघाडीवर टीका केली होती. यावरून आघाडीतील नेत्यांनी राज ठाकरे यांच्यावर टीकास्त्र सोडण्यास सुरुवात केली आहे. दरम्यान उपमुख्यमंत्री अजित पवार (Ajit Pawar) यांनी आज निशाणा साधला आहे. भडकाऊ भाषणं करुन रोजीरोटीचे प्रश्न मिटणार आहेत का? असा प्रश्न त्यांनी राज ठाकरे (Raj Thackeray) यांना विचारला आहे. शिर्डी उपविभागीय पोलिस अधिकारी कार्यालय, पोलिस स्टेशन आणि नुतन इमारत उद्घाटन कार्यक्रमात अजित पवार बोलत होते.

राज ठाकरे यांनी भाषणात बोलताना मशिदीवरील भोंगे खपवून घेणार नाही असा इशारा दिला होता. या संदर्भात बोलताना नाव न घेता अजित पवार म्हणाले, काही लोक निवडणूक डोळ्यासमोर ठेवून भाषण करतात. यामुळे तेढ निर्माण होऊ शकते. कोणाला तरी बरं वाटावं म्हणून भाषण करण्याने रोजीरोटीचे प्रश्न मिटणार का असा सवाल त्यांनी यावेळी केला.

यावेळी गृहमंत्री दिलीप वळसे पाटील यांनी देखील निशाणा साधला. ते म्हणाले, प्रत्येकाने आपल्या मर्यादा पाळाव्यात.राज्यात वेगवेगळ्या प्रसंगांच्या निमित्ताने आंदोलनं केली जात आहेत. संघर्ष निर्माण केले जात आहेत. राजकारण म्हणून आंदोलन केली जात आहेत. पोलिसांना सहकार्य करण्याऐवजी अशांतता निर्माण केली जाते. समाजात तेढ निर्माण केले जाते. सर्वत्र असं सुरु आहे. आता तरी हनुमान चालीसावरुन वाद सुरु आहे त्यामुळे प्रत्येकाने आपल्या मर्यादा पाळाव्यात असे खडेबोल राज ठाकरेंना सुनावले.

काय म्हणाले राज ठाकरे

"मशिदींवर एवढ्या मोठ्या आवाजात भोंगे का लावतात? मशिदीवरील भोंगे खपवून घेणार नाही. ज्या मशिदीबाहेर भोंगा दिसेल, त्याच्या समोर दुप्पट स्पीकर लावून हनुमान चालीसा लावणार असा इशारा राज ठाकरे यांनी दिला.