आज विधानसभा कामकाज सल्लागार समितीची बैठक पार पडणार आहे. या बैठकीमध्ये हिवाळी अधिवेशनाचा कालावधी आठवडा भराने वाढवण्यात यावा या मागणीवर चर्चा होणार आहे. गेल्या दोन वर्षामध्ये कोरोना महामारीमुळे अधिवेशन होऊ शकलं नाही. हिवाळी अधिवेशन जर तीन आठवड्यांच झालं तर चर्चा करून प्रश्न सोडवण्यासाठी फार मदत होईल. त्याचबरोबर सत्ताधारी आणि विरोधक यांनाही आपली बाजू चांगल्या प्रकारे मांडता येईल असंही अजित पवार बोलताना म्हणाले आहेत.

तर अजित पवार आज दुपारी एक वाजता नागपूरहून मुंबईला रवाना होणार आहे. यासाठी शिंदे सरकारकडून विमान उपलब्ध करुन देण्यात आलेलं आहे. त्याबद्दल बोलताना अजित पवार म्हणाले की, काल मुख्यमंत्री एकनाथ शिंदे यांनी सांगितलं की उद्या सकाळी विधानसभा कामकाज सल्लागार समितीची बैठक आहे. 'मी त्यांना म्हंटलं उद्या ऐवजी आपण परवा घेतली तर चालेल का? त्यावर शिंदे म्हणाले कारण काय आहे. ते म्हणाले मी दुपारी निघणार होतो. त्यामुळे त्यावर मुख्यमंत्री शिंदे म्हणाले 10 वाजता सल्लागार समितीची बैठक लावतो आणि मी तुम्हाला शासनाच वाहन उपलब्ध करून देतो. तुम्ही त्यातून जावा आणि तुमचं काय काम असेल ते करून परत या' असं अजित पवार म्हणाले आहेत.

मुख्यमंत्र्यांनी सांगितलं म्हणून आम्ही जात आहोत. त्यामुळे आज दुपारी 1 वाजता मी शिंदे यांनी उपलब्ध करून दिलेल्या विमानाने मुंबईला जाऊन पुन्हा त्याच विमानाने परत येण्याची शक्यता आहे. अशी माहिती विरोधी पक्षनेते अजित पवार यांनी दिली आहे. दरम्यान, आज राष्ट्रवादीचे नेते आणि माजी गृहमंत्री अनिल देशमुख जामिनावर तुरुंगातून बाहेर येत आहेत. त्यांना भेटण्यासाठी अजित पवार जाणार आहेत.