राज्याचे उपमुख्यमंत्री अजित पवार यांनी जीएसटी परिषदेच्या लखनऊमधील बैठकीवरून केंद्र सरकारवर टीका केली आहे. तसंच प्रश्न उपस्थित करताना त्यांनी पेट्रोल, डिझेल संदर्भात सुरु असलेल्या चर्चेवरून केंद्र सरकारला सुनावलं आहे. पेट्रोल डिझेलचा जीएसटीमध्ये समावेश केल्यास त्याबाबत महाराष्ट्र भूमिका घेईल असं अजित पवार म्हणाले. राज्याच्या कर लावण्याच्या अधिकारावर गदा येऊ नये अशी राज्य राज्यसरकारची भूमिका असेल असं त्यांनी स्पष्ट केलं.

केंद्राने केंद्राचे काम करावे, पण राज्याचे जे अधिकार आहेत त्यावर गदा येऊ नये, राज्याचे अधिकार तसेच रहावेत असे अजित पवार म्हणाले. मुद्रांक शुल्क आणि जीएसटीमधून राज्याला कर मिळतो. जे काही ठरलंय त्याप्रमाणे चालु रहावे. कोरोनाच्या संदर्भात ज्या सवलती आधी दिल्या आहेत त्या द्याव्यात असंही अजित पवार यांनी सांगितले.

पेट्रोल डिझेल संदर्भात काही भूमिका घेतली तर तिथे काही वेगळे मत येऊ शकते. राज्य सरकारचा कर कमी करण्याच्या अधिकार आहे आणि त्यावर जर गदा येत असेल तर आम्ही भूमिका घेऊ असेही अजित पवार म्हणाले. तसंच लखनऊमध्ये होत असलेल्या जीएसटी परिषदेच्या बैठकीबाबतही त्यांनी प्रश्नचिन्ह उपस्थित केले.