शिवसेनेच्या उद्धव ठाकरे गटाचे आज, १८ जून रोजी वरळी येथे राज्यव्यापी शिबीर पार पडले, या कार्यक्रमात बोलताना खासदार संजय राऊतांनी चौफेर टीका केली. तसेच महाविकास आघाडीविषयी बोलताना आपली इच्छा आहे तोपर्यंतच माविआमध्ये राहू असं वक्तव्य केलं. यावरून चर्चांना उधाण आले आहे. यानंतर आता राष्ट्रवादीचे नेते तसेच राज्यातील विरोधीपक्षनेते अजित पवारांनी राऊतांच्या वक्तव्यावर प्रतिक्रिया दिली आहे.

राऊत काय म्हणाले होते?

वरळीतल्या शिबीरात बोलताना खासदार संजय राऊतांनी राज्यातील राजकीय वर्तुळात भावी मुख्यमंत्री म्हणून चर्चेत असलेल्या नेत्यांवर टीका केली आहे. मागील काही दिवसांपासून राज्यात भावी मुख्यमंत्री म्हणून काही नेत्यांच्या नावाची चर्चा होत आहे. यावरून राऊतांनी टीका केली आहे.

राऊत म्हणाले की, "सध्या महाराष्ट्रामध्ये भावी मुख्यमंत्र्यांचं फार पीक आलं आहे. पाहावं तिकडं भावी मुख्यमंत्री. आपण महाविकास आघाडीमध्ये आहोत. राहू. जोपर्यंत आपली इच्छा आहे तोपर्यंत. ते काही आमच्या इच्छेवर नाहीये, हे राजकारण आहे. पण आपण पाहतोय भावी मुख्यमंत्री, अरे बाबानो अजूनही विद्यमान मुख्यमंत्री (उद्धव ठाकरे) समोर बसलेले आहेत." दरम्यान राऊतांच्या या विधानामुळे राज्याच्या राजकीय वर्तुळात चर्चांना उधाण आले आहे.

अजित पवारांचं म्हणणं काय…

संजय राऊतांनी भावी मुख्यमंत्री म्हणून चर्चेत असलेल्या नेत्यांवर नाव न घेता भाष्य केलं. सोबतच महाविकास आघाडीमध्ये राहण्याबद्दल देखील राऊत बोलले यानंतर आता विरोधीपक्षनेते अजित पवारांनी त्यांनी शुभेच्छा दिल्या आहेत.

संजय राऊत हेच मागे उद्धव ठाकरे मुख्यमंत्री असताना आमची आघाडी २५ वर्षे टिकणार असं म्हणायचे. तेव्हा त्यांना ती २५ वर्ष टिकावी वाटत असेल, आता त्यांनी पुढं आमचं एकट्याचं सरकार यावं असं वाटत असेल. त्यात चुकीचं काय? प्रत्येक पक्ष हा काहीतरी ध्येय डोळ्यासमोर ठेवून वाटचाल करत असतो. तशी इच्छा त्यांनी बोलून दाखवली आमच्या त्यांना शुभेच्छा आहेत असे अजित पवार यावेळी म्हणाले.