सातारा : आजपासून राज्यात शाळा (School) सुरू झाल्या असून अद्याप 18 वर्षाखालील मुलांचे लसीकरण झालेलं नाही. याबाबत उपमुख्यमंत्री अजित पवार (Ajit Pawar) म्हणाले, 12 ते 18 वर्षांच्या मुलांचे लसीकरण करावे, अशी चर्चा आहे. मात्र, केंद्राकडून (Central Government) तसा कोणताही निर्णय झालेला नाही. केंद्राचा निर्णय झाल्यावर लसीकरण सुरू केलं जाईल. परंतु, मुलांना शाळेत पाठवायचं, की नाही हा सर्वस्वी निर्णय पालकांचा आहे. अद्याप मुलांना शाळेत पाठवण्याची पालकांची मानसिकता दिसत नाही, असंही पवार यांनी सांगितलं.

उपमुख्यमंत्री अजित पवार हे रविवारपासून सातारा जिल्हा दौऱ्यावर आहेत. आज (सोमवार) उपमुख्यमंत्र्यांनी येथील शासकीय विश्रामगृहात सातारा जिल्ह्याची आढावा बैठक घेतली. या बैठकीनंतर त्यांनी माध्यमांशी संवाद साधला. ते पुढे म्हणाले, पारनेर आणि संगमनेर तालुक्यात कोविडची रुग्ण संख्या वाढू लागल्याने नगर जिल्ह्यातील 61 गावांवर निर्बंध लावले आहेत. पुणे आणि नाशिक जिल्ह्याला याचा फटका बसू नये, यासाठी आत्ताच नगर जिल्ह्यातील दोन तालुक्यातील रुग्ण संख्या रोखण्यासाठी निर्णय घेतल्याचे उपमुख्यमंत्री पवारांनी सांगितले.

उसाच्या एफआरपीबाबत (FRP) राजू शेट्टी यांनी सरकारला इशारा दिला आहे. यावर उपमुख्यमंत्री पवार म्हणाले, गतवर्षीची रिकव्हरी पाहून हा निर्णय घेतला जातो. राजू शेट्टी हे त्यांच्या पद्धतीने त्यांची भूमिका मांडत आहेत, त्या संदर्भात चर्चा करून पुढचा निर्णय घेतला जाईल. तसेच, कोरोना प्रादु्र्भावामुळे नगर जिल्ह्यातील 61 गावांत लॉकडाउन (Nagar Lockdown) करण्यात आला असल्याचेही त्यांनी शेवटी नमूद केले.