मुंबई : राष्ट्रवादीतून फुटून एक गट सत्ताधारी भाजप शिवसेना सरकारला मिळाल्यानंतर अजित पवार गटाने काल पत्रकार परिषद घेऊन आपल्या नव्या पदाधिकाऱ्यांच्या नियुक्त्या केल्या. यावेळी पक्षाचे राष्ट्रीय कार्याध्यक्ष प्रफुल्ल पटेल, छगन भुजबळ, सुनील तटकरे, अमोल मिटकरी, रूपाली चाकणकर यांसारख्या दिग्गज नेत्यांची उपस्थिती होती.

दरम्यान, या पत्रकार परिषदेवेळी अजित पवार आणि प्रफुल्ल पटेल यांच्यामध्ये काहीतरी अनऑफिशियल बोलणं सुरू होतं पण यावेळी पत्रकार परिषदेतील माईक सुरूच होता. त्यांच्यातील कुजबूज यामध्ये रेकॉर्ड झाली असून हा व्हिडिओ सोशल मीडियावर व्हायरल झाला आहे.

या व्हिडिओमध्ये शरद पवार प्रफुल्ल पटेल यांच्यासोबत कुजबूज करत असून "त्यांना अपात्र करायचं" असं ते बोलताना दिसत आहेत. यावर प्रफुल्ल पटेल कुणाला? असा प्रतिप्रश्न करतात. त्यावर अजित पवार हे जयंत पाटील यांचं नाव घेत असल्याचं या व्हिडिओमध्ये दिसत आहे.

अजित पवार गटाने आपल्या पत्रकार परिषदेमध्ये सुनील तटकरे यांची प्रदेशाध्यक्षपदी, अजित पवार यांची विधीमंडळ नेते पदी आणि अनिल पाटील यांची प्रतोदपदी नियुक्ती करण्यात आली आहे. तर पक्षातील इतर पदांवरील नियुक्त्यांचे सर्व अधिकार हे तटकरे यांना देण्यात आले आहेत.

अजित पवार गटाकडून पदाधिकाऱ्यांच्या नियुक्त्या करण्यात आल्या असून जितेंद्र आव्हाड यांना अपात्र करण्याचा आणि जयंत पाटील यांना प्रदेशाध्यक्ष पदावरून पदमुक्त निर्णय घेण्यात आला आहे. तर शरद पवार गटाने पक्षविरोधी कारवाया केल्यामुळे सुनील तटकरे आणि प्रफुल्ल पटेल यांना निलंबीत करण्यात आले आहे.